Sarqanda máıiti qoqystan tabylǵan qyzdy óltirgen anasy men naǵashy aǵasy 15 jylǵa sottaldy

TALDYQORǴAN. QazAqparat - Jetisý oblysynyń Sarqan aýdanynda qoqystan basy bir bólek, denesi bir bólek kúıinde tabylǵan 5 jastaǵy qyzdy óltirgen anasy men naǵashy aǵasy sottaldy. Búgin olarǵa sot úkimi shyǵyp, árqaısysy 15 jylǵa temir torǵa qamaldy, - dep habarlaıdy QazAqparat tilshisi.

Esterińizge sala keteıik, osydan 7 aı buryn Sarqan qalasynyń shetindegi qoqystan 5 jastaǵy qyzdyń múrdesi tabylǵan bolatyn. Arýjan esimdi qyzdyń máıiti qoqysta 3 aı boıy jatqany belgili boldy. Qur qańqasy ǵana qalǵan balanyń máıitin dalada oınap júrgen balalar taýyp alǵan.

Anyqtalǵandaı, qyzdy týǵan anasy men naǵashy aǵasy qylqyndyryp óltirip, qoqysqa tastap ketken. Al óltirilgen balany anasy 14 jasynda bosanypty. Ony sol kezde aǵasy zorlap, júkti bolyp qalǵan.

Qazir 20 jastaǵy anasy úshinshi balasyna aıaǵy aýyr. Endi ol bul sábıin temir torda dúnıege ákeledi. Aıta keteıik, sottalyp jatqan Aqnıet pen Aqtilek týǵan aǵaıyndy. Olardyń ata-anasy qaıtys bolyp ketken.

«Jas balany óltirý faktisi boıynsha naǵashy aǵasy men sheshesine qatysty sot úkimi jarııalanyp, olarǵa 15 jyldan basbostandyǵynan aıyrý jazasy taǵaıyndaldy. Tolyǵyraq aıtyp ketetin bolsaq, balanyń naǵashy aǵasy men sheshesi aldyn ala sóz baılasý arqyly jas balany óltirip, denesin qoqys alańyna qaltyryp ketken. Sot otyrysynda olar óz kinálaryn moıyndady», - dedi Jetisý oblystyq sotynyń resmı ókili Nursultan Orynbasarov.