Sarqan aýdanynda turǵyndardyń jappaı sýdan ýlanǵany týraly aqparat - feık

NUR-SULTAN. QazAqparat – Jetisý oblysynyń Sarqan aýdanynda turǵyndardyń jappaı sýdan ýlanyp jatqany týraly aqparat shyndyqqa janaspaıdy.

Bul týraly Sanıtarııalyq-epıdemıologııalyq baqylaý komıtetiniń resmı ókili Erjan Baıtanaev málim etti, dep habarlaıdy QazAqparat tilshisi.

«Sanıtarııalyq-epıdemıologııalyq baqylaý komıteti - Jetisý oblysy Sarqan aýdanynyń turǵyndary jappaı sýdan ýlanyp jatqany týraly aqparat shyndyqqa janaspaıtynyn habarlaıdy. Sarqan aýdandyq sanıtarııalyq-epıdemıologııalyq baqylaý basqarmasy turaqty negizde monıtorıng júrgizip otyrady. Sońǵy zertteýlerdiń nátıjesinde sýdaǵy mıkrobıologııalyq jáne sanıtarııalyq-hımııalyq kórsetkishter sanıtarııalyq normaǵa sáıkes keletini anyqtaldy. Sonymen qatar, turǵyndar aýdandyq aýrýhanaǵa ýlaný týraly shaǵymdarymen júgingen joq», - dep túsinikteme berdi Erjan Baıtanaev.