Saryózektegi sýıtsıd: Marqumnyń týystary polıtsııa qyzmetkerlerin kinálaıdy
TALDYQORǴAN. KAZINFORM - Jetisý oblysynda 27 jastaǵy jigit ózine qol saldy. Al týystary onyń ólimine polıtsııa qyzmetkerlerin kinálap otyr.
Olardyń aıtýynsha, polıtseıler oǵan istemegen qylmysty moınyna aldyrtpaq bolǵan.
Qaıǵyly oqıǵa 20 - aqpan kúni bolǵan.
Azat Qudaıbergenov ózine qol salar aldynda inisine qońyraý shalyp, aýyl syrtyna tezirek kelýin ótinedi. Іle- shala artynan barǵan ákesi men baýyry marqumdy toq baǵanyna asylyp turǵan jerinen tapqan.
Kýágerlerdiń aıtýynsha marqum, jerge uıaly telefonyn qoıyp, janyna hat jazyp qaldyrǵan.
- Biz kelsek temir baǵanda asylyp tur. Ákem ekeýmiz jerge túsirip aldyq. Arqan aǵamnyń moıynyn qıyp jibergen. Sońǵy demi sol jerde shyqty. Artynsha týysqan aǵamyzdy shaqyrdyq. Ol kisi kelip birden 102- ge qońyraý shaldy. Polıtseıler 15-20 mınýtta kelip, bárin fotoǵa túsirip, múrdeni alyp ketti. Jedel járdem shaqyraıyq degenge kónbedi,- dedi inisi Saǵat Qudaıbergenov.
Qara jamylǵan otbasy oqıǵa ornyna jedel járdem shaqyrtpaǵan polıtsııa qyzmetkerlerine narazy. Anasy ulynyń ólimine de solardy kinálaıdy. Dúkende bolǵan urlyqqa jazyqsyz 2 balamdy tergep, olarǵa qysym kórsetti dep otyr.
- Munyń aldynda 2 ulym Saryózektegi jemis- jıdek dúkeninde istegen. Bular jumystan shyǵyp ketkennen keıin dúkende urlyq bolady. Soǵan ekeýin kúdikti dep 2 kún súıredi. Azat 3-shi kúni ózine saldy. Qaza bolǵan soń denesin máıithanaǵa aparmaı polıtsııa bólimshesinde ustaǵan. Bizdi ishke kirgizbeı qoıdy. Tek keshke qaraı ǵana Taldyqorǵandaǵy máıithanaǵa jibergen. Oǵan dálel máıitti alýǵa barǵanda sol jerdegi kezekshi qyzdar ulymnyń denesi keshki saǵat 8-00-der shamasynda ǵana jetkizilgenin aıtty. Múrdesin kórdik. Erininiń aınalasy kógergen, qoly jyrylǵan, kóziniń janynda da syrylǵan jeri bar, - dedi anasy Gúlbaǵıza Ońǵarbaeva.
Týystarynyń qolyndaǵy hatta qysym kórsetken polıtsııa qyzmetkeriniń aty- jóni jazylǵan. Bul is boıynsha quzyrly organ ókilderi is qozǵalǵanyn málimdedi.
- Jetisý oblysy Polıtsııa departamentiniń Ózindik qaýipsizdik basqarmasy «Ózin-ózi óltirýge deıin jetkizý» faktisi boıynsha qylmystyq isti tergeýde. Qajetti keshendi tekserý sharalary júrgizilýde. Qazirgi ýaqytta oqıǵanyń barlyq mán-jaıy anyqtalyp jatyr. Taraptardyń barlyq ýájderi, málimdemeleri, sondaı-aq marqumnyń týystary usynǵan málimetter tergeý barysynda muqııat zertteletin bolady. QR QPK-niń 201-babyna sáıkes, ózge málimetter jarııa etýge jatpaıdy. Tergeý Polıtsııa departamenti basshylyǵynyń erekshe baqylaýynda,- dedi Jetisý oblystyq polıtsııa departamentiniń baspasóz qyzmeti.
Marqumnyń otbasy istiń ádil tergelýin talap etedi.
Osyǵan deıin Saryózektegi sarbaz ólimi týraly jazǵanbyz.