«Sarybulaq» qory taýsylady, zaısandyqtar kógildir otynmen qalaı qamtylmaq

ASTANA. KAZINFORM — Elimizdiń soltústik pen shyǵys óńirlerge kórshi elderden gaz ımporttaý boıynsha kelissóz júrgizilip jatyr. Bul týraly Májilis depýttarynyń saýalyna premer-mınıstr Oljas Bektenovtiń jaýabynda aıtylǵan.

— Úkimet soltústik jáne shyǵys óńirler úshin kórshiles elderden gaz ımporttaý máselesi boıynsha áleýetti ınvestorlarmen kelissózder júrgizip jatyr. Shyǵys Qazaqstan oblysynyń Zaısan aýdanyn gazdandyrýǵa keler bolsaq, «Sarybulaq» ken ornynyń (jalǵyz gaz kózi) qorlarynyń taýsylýyna baılanysty aýdannyń shamamen 23 myń turǵynyn ári qaraı gazben jabdyqtaý úshin balama gaz kózin aıqyndaý qajettigi týyndap otyrǵanyn habarlaımyz, — dedi Úkimet basshysy.

Premer-mınıstr dereginshe, qazirgi ýaqytta ken ornynyń qaldyqty qorlary jylyna nebary 216 mln tekshe metrdi quraıdy nemese 6,5 jylǵa jetedi. Búginde aýdan turǵyndary jylyna 32,8 mln tekshe metr gaz tutynady.

— Osyǵan baılanysty Zaısan aýdanynyń tutynýshylaryn suıytylǵan tabıǵı gazben qamtamasyz etý máselesi pysyqtalyp jatyr. Bul nusqa qarastyrylyp otyrǵan aýmaqta gazdandyrý boıynsha iri ınfraqurylymdyq jobalar iske asyrylǵan kezge deıin aralyq nemese balama sheshim retinde usynylady, — dedi Oljas Bektenov.

Aıta keteıik, Zaısan aýdanyndaǵy «Sarybulaq» ken ornynyń mańynda qosymsha gaz barlaý jumystary júrip jatyr.