Sarybel týrısterdi nesimen tartady – Buqtyrma jaǵalaýynan fotoreportaj
ÓSKEMEN. KAZINFORM – Shyǵys Qazaqstan oblysy Samar aýdanyndaǵy Sarybel aýyly - Buqtyrma sý qoımasynyń jaǵasynda oryn tepken demalys orny. Altyn qumdy jaǵajaıymen, jyly sýymen jáne kórikti tabıǵatymen ereksheletin bul jerge keletinder kóp. Alaıda munda demalýshylar úshin barlyq jaǵdaı jasalǵan deýge áli erte. Kazinform tilshisi Sarybelge baryp, búgingi jaǵdaıdy óz kózimen kórip qaıtty.
Sarybel men Óskemen qalasynyń arasy 200 shaqyrymdaı jol. Ireleńdegen jolmen quıǵytyp júre almaısyń.
Burylys-qaltarysy, óri men eńisi kóp bolǵandyqtan kólikti barynsha saq júrgizý kerek.
Al jazdyń týrıstik maýsymy qyzyp turǵan shaǵynda kóliktiń kóptigi de jyldam jetýińizge kedergi. Sondyqtan ortasha eseppen Óskemennen Sarybelge 2,5-3 saǵattaı jol júresiz.
Jolaı toqtap, tabıǵattyń ásem kórinisterine kóz salsańyz bolady.
Kúnbaǵys alqaby da erekshe ádemi.
Sarybelge jetpesten buryn Mırolıýbovka aýylyna kelesiz. Bul da Buqtyrma sý qoımasynyń jaǵasyna jaqyn ornalasqan eldi meken.
Onda demalýshylarǵa qajetti túrli zattar satylatyn dúkenderdi baıqadyq.
Jalpy Samar aýdanynda 70-ten astam demalys bazasy jumys isteıdi. 600-ge jýyq úı jáne shamamen 3 000 týrıske arnalǵan oryn bar eken.
Aýdan ákimdigi bıyl Sarybel aýylynda ınternet sapasyn jaqsartý maqsatynda antenna-dińgekti qurylystar ornatylǵanyn málim etken bolatyn. Alaıda demalys bazalarynda Wi-Fi-ǵa qosylmasańyz, uıaly telefonnyń ınterneti durys ustamady.
Mine jaǵalaýǵa da keldik. Shomylyp júrgender, jaǵada kún sáýlesine qyzdyrynyp jatqandar az emes.
Sýy jyp-jyly, jaǵasy qum. Buqtyrma sý qoımasynyń ar jaǵynda aspanmen astasqan taýlar kózdiń jaýyn alady.
Jaǵalaýǵa jaqyn mańda kólik qoıatyn oryn bar. Sonyń dál qasynda eki ájethana tur. Aýyldaǵy kádýilgi aǵash ájethanalar. Biraq múlde joq bolǵannan jaqsy.
Qoqys tógetin eki konteınerdi baıqadyq. Bálkim sodan da shyǵar, jaǵalaýda shashylyp jatqan qoqys joq.
Jaǵalaýdan qandaı da bir tyıym salynǵan nemese eskertý jasalǵan belgilerdi kózimiz shalmady. Esesine sý ishýge kelgen jylqylardy kórdik. Jaǵada ózderimen-ózderi jaıbaraqat jaıylyp júr. Álde ıesi sýǵa shomylyp júr me eken?!
Dál jaǵalaýda dúken joq. Alakól nemese basqa da demalys oryndaryndaǵy sııaqty qyzdyrynyp jatqan jerińizge kelip, as-sýyn usynatyndar da joq munda.
Sol úshin iship-jeıtindi ózińizben birge ala kelgen jón. Nemese eń jaqyn degen dúkenge baryp, keregińizdi alyp kele alasyz.
Sýda ara-tura katerler júıtkip ótedi.
Qumdy jaǵalaýda ulý qabyrshaqtary jatyr.
Bul jerge halyqtyń kóptep keletin bir sebebi – Buqtyrmanyń sýy birden tereńdemeıdi, 100-150 metrge deıin taıaz bolyp turady. Sýdyń asty qum. Sol úshin bul bala-shaǵamen kelip demalýǵa taptyrmas oryn.
Qoryta aıtqanda, Sarybeldi damyta túsý úshin týrısterge qolaıly jaǵdaı jasaýǵa basa den qoıý kerek. Demalys úılerin kóptep salyp, uıaly baılanys pen ınternet jyldamdyǵy kúsheıse quba-qup. Sol kezde munda keletinder sany áldeqaıda kóbeıetini sózsiz.
Eske salsaq, osyǵan deıin Shyǵys Qazaqstanda shomylý maýsymy bastalǵaly úsh adam sýǵa batqany habarlanǵan.
