Elordanyń Saryarqa aýdany ákimi qyzmetinen bosatyldy

ASTANA. KAZINFORM — Eraly Baýyrjan Beıbituly 2023 jyldyń sáýir aıynan bastap Saryarqa aýdanynyń ákimi qyzmetin atqardy. Osy ýaqyt aralyǵynda abattandyrý, ınfraqurylym júıesin damytý, kedergisiz jaıly aýdan qurý baǵyttaryna erekshe kóńil bólindi.

Atap aıtqanda, Saryarqa aýdanynyń aýmaǵynda 2 jyl ishinde 106 aýla tolyqtaı abattandyryldy, tarıhı kóshelerdi jańartý, 10 qaraýsyz qalǵan aýmaqta qoǵamdyq keńistikter paıda bolyp, 9 gúlzar qaıta jóndeýden ótti. 40-qa jýyq kóshe ortasha jóndeýden ótip, jaıaý júrginshiler jolymen qamtyldy.

Sonymen qatar, «Kóktal-1,2» turǵyn alaptarynda 11 kóshede keshendi ınjenerlik jelilerdi jańartý jumystary júrgizildi. Bul jumystar aıasynda ınternet júıesi tartylyp, sý burý jelileri jańartyldy, kósheler jaryqtandyrylyp, avtokólik jáne jaıaý júrginshiler joldary tolyqtaı qaıta jóndeldi.

Júzege asqan eń mańyzdy sheshimderdiń biri – qalalyq ákimdiktiń qoldaýymen 200-den astam úı ornalasqan «Nur-Besik» shaǵyn aýdanynyń (Kóktal-1) turǵyndaryna quqyq belgileıtin qujattar berý máselesiniń sheshilýi.

«Bul jetistikter – turǵyndardyń senimi men aýdan apparatynyń eńbeginiń nátıjesi. Jeke qabyldaýlarda, kezdesýlerde mańyzdy suraqtar kóterip, usynystaryńyzdy jetkizgenderińiz úshin alǵysym sheksiz. Ár dıalog, ár pikir bizdi alǵa jetelep, óz jumysymyzdy jaqsartýǵa múmkindik berdi. Biz keıde daýlasyp, pikir almasyp jatsaq ta, ortaq maqsat –aýdanymyzdy jaqsartý jolynda birlese eńbek ettik. Árqashan qoldaý kórsetkenderińiz jáne ashyq dıalog ornatqandaryńyz úshin barshańyzǵa úlken alǵysymdy bildiremin!» - dedi Baýyrjan Beıbituly.

Aıta keteıik, buǵan deıin «Ulttyq jáne at sporty túrleri ortalyǵynyń» dırektory taǵaıyndalǵanyn jazdyq.