«Saryarqa» arnaıy ekonomıkalyq aımaǵy basqarmasynyń jańa tóraǵasy taǵaıyndaldy

ASTANA. KAZINFORM – «Saryarqa» arnaıy ekonomıkalyq aımaǵy basqarmasynyń tóraǵasy bolyp Dáýlet Ábdýálıuly Oralov taǵaıyndaldy. Bul týraly Qaraǵandy oblysy ákimdiginiń baspasóz qyzmeti habarlady. 

Dáýlet Oralovtyń joǵary zańgerlik jáne qarjylyq bilimi bar.

Ár jyldary memlekettik jáne jeke qurylymdarda jaýapty laýazymdardy atqardy.

Eńbek jolyn 2012 jyly Almaty qalasy Ádilet departamentinde memlekettik satyp alý bóliminiń mamany bolyp bastaǵan. Sodan keıin «Almaty» ÁKK-de jobalaý menedjeri, «Alan Parking» JShS bas dırektorynyń orynbasary, «Almaty» ÁKK-de jobalardy basqarý jáne ınvestıtsııalar tartý departamentiniń dırektory qyzmetin atqardy.

2018–2021 jyldary Dáýlet Oralov Almaty oblysy ákiminiń kómekshisi boldy.

Keıingi jyldary ónerkásip sektorynda - «Aluminium of Kazakhstan» JShS basqarýshy dırektory, «Petro Premium Service» JShS bas dırektory bolyp jumys istedi.

2023 jylǵy qazannan bastap osy kúnge deıin «Qazaqtelekom» AQ-da eńbek qaýipsizdigi jáne eńbekti qorǵaý jónindegi bıznes-jattyqtyrýshy jáne menedjer laýazymdaryn atqardy. 

Aıta keteıik, saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetterdi myna jerden oqı alasyz.