Saryaǵashtyq áıel Tık-tokqa kirýge tyıym salǵan kúıeýin óltirip, denesin bólshektep, ózenge aǵyzyp jibergen
TÚRKІSTAN. KAZINFORM - Sottalýshynyń qylmystyq áreketke barýyna jubaıynyń «Tık-tok» jelisine kirýge shekteý qoıýy sebep boldy.
Túrkistan oblysynyń qylmystyq ister jónindegi mamandandyrylǵan aýdanaralyq sotynda QR QK 99-baby 2-bóligi 5-tarmaǵymen jáne 190-baby 1-bóligimen túsken qylmystyq is qaraldy.
Oqıǵa ótken jyldyń tamyz aıynda Saryaǵash aýdanynda boldy. Sottalýshy zańdy nekedegi kúıeýimen qarbyz jep otyryp, moıyn tusyna pyshaq suǵyp alǵan. Jerge qulap moınynan qan atqylap jatqan jubaıynyń ishine pyshaq tyǵyp, jerde jatqanda taspen birneshe ret basynan urǵan.
Bul iske kúıeýiniń «Tık-tok» jelisine kirýge shekteý qoıýy jáne sol sebepti bolǵan janjal negizgi sebep bolǵan.
Sottalýshy qylmysyn jasyrý úshin kórshisiniń úıinen dybys kúsheıtkish aldyryp, úıiniń aldyna án qosqan. Sodan, jábirlenýshiniń denelerin birneshe bólikke bólshektep, olardy bóshkege salǵan. Qylmystyq quqyq buzýshylyǵyn jasyrý maqsatynda tanystarynyń avtokólikterimen tasyp, «Keles» ózenine aǵyzyp jiberip otyrǵan.
Sonymen birge, sottalýshy qylmystyq quqyq buzýshylyq is áreketin ári qaraı jalǵastyra otyryp, jubaıyna tıesili avtokólikti tanysyna aldap 2 300 000 teńgege satyp jibergen.
Sot úkimimen Qazaqstan Respýblıkasy Qylmystyq kodeksiniń 99-baby 2-bóligi 5-tarmaǵymen jáne 190-baby 1-bóligimen kináli dep tanylǵan sottalýshyǵy túpkilikti 15 (on bes) jyl merzimge bas bostandyǵynan aıyrý jazasy taǵaıyndaldy.
«Jazany qylmystyq-atqarý júıesiniń qaýipsizdigi ortasha mekemesinde óteý belgilengen. Sonymen birge, sottalýshynyń 14 jáne 12 jastaǵy balalaryn qamqorshylylyq nemese qorǵanshylyqqa berý máselesin sheshý úshin «Saryaǵash aýdanynyń adamı áleýetti damytý bólimi» MM-niń qamqorshylyq nemese qorǵaýshylyq fýnktsııasyn júzege asyrý organyna joldaý týraly qaýly shyǵaryldy. Úkim zańdy kúshine engen joq» delingen Túrkistan oblystyq sotynyń baspasóz qyzmeti usynǵan aqparatta.
