Saryaǵashtaǵy mektepte árleý jumystary kezinde ýlanǵandar sany ósti

TÚRKІSTAN. KAZINFORM – Saryaǵash aýdanynda mekteptegi árleý jumysynan keıin ýlanǵan oqýshylar men muǵalimderdiń sany taǵy da ósti. Búgin 6 muǵalim men 2 oqýshy jergilikti emhanaǵa qaralyp, alǵashqy medıtsınalyq kómek aldy.

«Barlyq qaralýshylardyń jaǵdaıy qanaǵattanarlyq, statsıonarlyq kómekti qajet etpeıdi. Barlyq qaralǵan naýqastar medıtsına qyzmetkerleriniń qatań baqylaýynda. Olarǵa tútinder men býlardyń toksıkalyq áseri degen dıagnoz qoıyldy» - delingen Túrkistan oblysy densaýlyq saqtaý basqarmasy tarapynan usynylǵan aqparatta.

Aıta keteıik, keshegi kúni Jartytóbe aýyldyq okrýgindegi Yntymaq aýylynda ornalasqan N9 Maılyqoja atyndaǵy orta mektebinde muǵalimder men oqýshylar hımııalyq zattan ýlanyp qalǵan bolatyn. Mekteptegi árleý jumystarynan soń ondaǵy 30-ǵa jýyq oqýshy men 10-nan astam ustaz ózin jaısyz sezinip, dárigerdiń kómegine júgingen.