Saryaǵashta nóser jaýynnan keıin úılerge sý kirdi
TÚRKІSTAN. KAZINFORM — Túrkistan oblysy Saryaǵash aýdanynda nóserli jaýyn-shashyn saldarynan birneshe eldimekende turǵyn úılerdiń aýlalary men kóshelerdi sý basty.
Áleýmettik jelilerde Saryaǵash aýdanyndaǵy sý basqan aýmaqtar túsirilgen beınejazbalar tarady.
Oblystyq Tótenshe jaǵdaılar departamentiniń málimetinshe, Darbaza jáne Erdáýit aýyldarynda 8 jeke turǵyn úıdiń aýlasyna jáne 3 kóshege jańbyr sýy jınalǵan. Sý deńgeıi shamamen 40 santımetrge deıin jetken.
— Oqıǵa saldaryn joıý jumystaryna Tótenshe jaǵdaılar departamentiniń 12 qyzmetkeri, 2 tehnıka jáne 4 motopompa jumyldyryldy. Sondaı-aq jergilikti atqarýshy organnan 11 adam men 4 tehnıka tartyldy. Qazirgi ýaqytta jańbyr sýyn sorý jáne qaýipsiz arnaǵa burý jumystary júrgizilip jatyr. Turǵyn úılerdiń ishine sý kirmegen. Zardap shekkender joq, — delingen habarlamada.
Saryaǵash aýdany ákimdiginiń habarlaýynsha, nóserden keıin kelgen sý aǵyny Qurkeles aýyldyq okrýgine qarasty Aqúı eldimekenine de jetken. Jaǵdaıdy turaqtandyrý úshin sý Jańa Talap eldimekeni aýmaǵyndaǵy Qaratuqym qashyrtqysy arqyly Saryúısin kanalyna burylyp jatyr.
Bul jumystarǵa 7 motopompa, 10 arnaıy tehnıka tartylyp, tótenshe jaǵdaılar qyzmetiniń mamandary, jergilikti atqarýshy organ, aýdandyq polıtsııa bóliminiń qyzmetkerleri jáne aýdandyq máslıhat depýtattary atsalysyp jatyr.
Saryaǵash aýdanynyń ákimi Arman Abdýllaev tótenshe jaǵdaı bolǵan aýmaqtardy aralap, ahýalmen tanysty. Qazir nóserden keıin qalpyna keltirý jumystary úzdiksiz júrgizilip jatyr. Jaǵdaı jaýapty qyzmetterdiń turaqty baqylaýynda.
Buǵan deıin Kentaýda nóser jaýynnan keıin kósheler men aýlalardy sý basqany týraly habarlaǵan edik.
