Saryaǵashta mekteptegi árleýden keıin oqýshylar men muǵalimder jappaı ýlanyp qaldy
TÚRKІSTAN. KAZINFORM - Qazirgi tańda prokýratýra men sanıtarııalyq-epıdemıologııalyq baqylaý basqarmasy tergep tekserý jumystaryn júrgizip jatyr.
Áleýmettik jelide Saryaǵash aýdanynda muǵalimder men oqýshylardyń jappaı ýlanǵandyǵy jaıynda aqparat tarady. Onda Maılyqoja atyndaǵy №9 mektepte júrgizilgen árleý jumystarynan soń, sabaqqa kelgen 100-den astam oqýshy men 10-ǵa jýyq muǵalim ýlanyp, dárigerlerge júgingeni jazylǵan. Al, atalǵan jaǵdaıǵa baılanysty aqparat taratqan Túrkistan oblysy bilim basqarmasynyń baspasóz qyzmeti másele baqylaýǵa alynǵandyǵyn málimdedi.
«Dúısenbi kúni oqýshylar men muǵalimder mektepke kelgennen keıin ózderin jaısyz sezinip, mektep medbıkesi alǵashqy kómek kórsetken. Jedel járdem shaqyryp 29 bala, 10 muǵalimdi aýrýhanaǵa tekserýge alyp barǵan. Aýrýhanaǵa alyp ketken barlyq 29 oqýshy, 8 muǵalimniń jaǵdaıy birqalypty bolǵannan keıin, úılerine qaıtaryldy. Qalǵan 2 ustaz aýrýhanada. Oqýshylar aldaǵy 3 kúnde qashyqtyqta bilim alatyndyǵy týraly sheshim qabyldandy. Oqýshylar men muǵalimderdiń qaýipsizdigi qatań baqylaýda», - delingen vedomstva tarapynan usynylǵan aqparatta.
Túrkistan oblysy bilim basqarmasynyń basshysy Ǵalymjan Sultanbekuly búgin Saryaǵash aýdanyna arnaıy baryp, mektep ujymymen jáne ata-analarmen kezdesti. Eki jaqtyń ýájderin tyńdap, máseleniń turaqty baqylaýda bolatyndyǵyn jetkizdi.
Sondaı-aq, qazir aýdandyq prokýratýra men sanıtarııalyq-epıdemıologııalyq baqylaý basqarmasy tarapynan tergep tekserý jumystary júrgizilip jatyr. Nátıjesine sáıkes, mektep dırektoryna jáne jaýapty orynbasarlaryna tıisti sharalar kórilmek.
