Saryaǵashta kórshi balany qasaqana óltirgen jasóspirim qylmystyq jaýapkershilikten bosatyldy
TÚRKІSTAN. KAZINFORM – Túrkistan oblysynyń qylmystyq ister jónindegi mamandandyrylǵan aýdanaralyq sotynda aýyr qylmys jasady dep aıyptalǵan jasóspirimge qatysty is qaraldy.
Tergeý derekterine súıensek, birinshi jaǵdaı 2024 jyldyń 16 mamyrynda, Túrkistan oblysy Saryaǵash aýdanyna qarasty Sirgeli aýylynda bolǵan. Jasóspirim aýladaǵy ájethana shuńqyryna 2021 jyly týǵan kórshi balany kúshtep ıterip, qasaqana óltirgen.
Al, ekinshi jaǵdaı 2024 jyldyń 13 shildesinde tirkelgen. Bul joly aıyptalýshy 2019 jyly týǵan taǵy bir kórshi balany sol tásilmen ómirinen aıyrýǵa árekettengen. Alaıda, bul áreketi júzege aspaı qalǵan.
Sot otyrysy barysynda usynylǵan keshendi sot-psıhıatrııalyq jáne psıhologııalyq saraptama qorytyndysyna sáıkes, sottalýshy «shızofrenııa sımptomdary qabattasqan jiti polımorfty psıhozdyq buzylý» dıagnozyna shaldyqqany anyqtaldy. Sonyń saldarynan ol oqıǵa bolǵan sátte óziniń áreketterine tolyq esep bere almaǵan jáne olardyń mánin durys túsine almaǵan.
2025 jyly sotpen taǵaıyndalǵan qosymsha keshendi qaıtalama saraptama da osy dıagnozdy rastady.
— Qazaqstan Respýblıkasy Qylmystyq kodeksiniń 16-babyna sáıkes, aqyl-esi durys emes kúıde qoǵamǵa qaýipti is-áreket jasaǵan adam qylmystyq jaýaptylyqtan bosatylady. Osyǵan oraı, 2025 jyldyń 5 naýryzynda sot sottalýshyny qylmystyq jaýapkershilikten bosatyp, ony ıntensıvti baqylaýmen mamandandyrylǵan úlgidegi psıhıatrııalyq statsıonarda medıtsınalyq sıpattaǵy májbúrlep emdeýge jiberý týraly sheshim qabyldady. Sondaı-aq, jábirlenýshilerdiń talap aryzdary ishinara qanaǵattandyrylyp, zańdy ókilinen 20 mln teńge óndiriletin boldy. Sot qaýlysy zańdy kúshine endi, delingen Túrkistan oblystyq sotynyń baspasóz qyzmeti taratqan aqparatta.
Aıta keteıik, budan buryn Túrkistan oblysynda muǵalim 14 jastaǵy qyzdy zorlamaqshy bolǵanyn jazǵan bolatynbyz.