Saryaǵashta aýyl mektebiniń oqýshylary men ustazdary kúndelikti sabaqqa ulttyq kıim kıip keledi
SARYAǴASh. KAZINFORM — Saryaǵashta ulttyq qundylyqtardy ulyqtaǵan mektep bar.
Nurly jol aýylynda ornalasqan B.Omarov atyndaǵy № 50 mekteptiń oqýshylary ulttyq naqyshtaǵy kıim kıip, sabaqqa barýdy kúndelikti ádetke aınaldyrǵan.
Bul bastamaǵa mektep ustazdary da atsalysyp keledi.
Sondaı-aq, bilim oshaǵynyń ujymy qazaq tili men ádebıeti, dene shynyqtyrý jáne eńbek pánderinde de ulttyq qundylyqtar men salt-dástúrlerge basymdyq beredi.
Máselen, oqýshylar úıirme sabaqtarynda ulttyq aspaptardy meńgeredi. Qos ishekti dombyramen kúı shertken shákirtter ulttyq bıdi de nazardan tys qaldyrmaıdy.
Qazaqtyń ulttyq oıý-órnekteri, syrmaq syrý, quraq quraý ónerin úırenedi.
Al, dene shynyqtyrý úıirme sabaqtarynda ulttyq sport keńinen nasıhattalyp, asyq atý, arqan tartý, toǵyzqumalaq oıyndaryn oınaıdy.
Tipti, qazaq kúresinen júldeli oryndardy ıelenip, baıraqty básekelerde aýdan mereıin ústem etken oqýshylar da bar.
Atap aıtar bolsaq, ulttyq oıyn kókpardan 11 synyp oqýshysy Aıdarhan Bóribaı «Úzdik shabandoz» nomınatsııasyn jeńip alǵan.
Mektep ustazdary ulttyq qundylyqtardy tek sabaq oqytý úderisinde ǵana emes, túrli saıystarmen de dáripteýde.
Aıtalyq, mektepte qyz ben jeńge, áke men uldar arasyndaǵy jarystar jıi uıymdastyrylady.
Máselen, «Burymdy qyz» baıqaýy, «Syrǵalym syrlasym» qyz ben jeńge saıysy, «Aǵasy bardyń jaǵasy bar» aǵa men qaryndas saıysy, patrıottyq ánder baıqaýy, «Qazaq esebi» chellendji, «Asyq atý» chellendji sekildi is-sharalar jıi ótkizilip turady.
Osylaısha saryaǵashtyq muǵalimder salt-dástúrdi jańǵyrtyp, ulttyq bolmystyń umyt qalmaýyna muryndyq bolyp keledi.
Mektep basshysynyń aıtýynsha, mundaı baǵyt — mektep oqýshylarynyń rýhanı damýyna, boılaryndaǵy ulttyq bolmysty qalyptastyrýǵa sep bolýda.
Bilim shańyraǵynyń bastamalaryna qazir Saryaǵash aýdanyndaǵy ózge de mektepter qyzyǵýshylyq tanytyp otyr.
«Mektebimiz ótken jyly Táýelsizdik merekesiniń qarsańynda paıdalanýǵa berilgen bolatyn. Jańa mektepke jańa ıdeıalarmen keldik. Basty maqsatymyz — ulttyq qundylyqtarymyzdy dáripteý boldy. Sodan arnaıy tapsyryspen ulttyq kıimderdi zamanaýı stılde tiktirdik. Bul bastamaǵa ata-analar men ustazdar qaýymy qoldaý bildirdi. Qazir oqýshylarymyz ben ustazdarymyz ulttyq naqyshtaǵy kıimderdi tek merekelik is-sharalarda ǵana emes kúndelikti mektepke kıip keledi. Mektep ujymynyń bul nebári 2 aıda jetken jetistigi» — deıdi mektep dırektory Nurbala Sarybaeva.
