Saryaǵash shıpajaıynan Keles ózenine aqqan káriz sýynyń máselesi qashan sheshiledi
TÚRKІSTAN. KAZINFORM — Saryaǵash aýdanynyń aýmaǵynan ótetin Keles ózenine shıpajaılardan aqqan káriz sýy máselesin birjola sheshý úshin qomaqty qarajat kerek.
Saryaǵash sanatorııinen aqqan káriz sýy Keles ózenine quıylyp jatqanyn buǵan deıin de kótergen bolatynbyz.
Áleýmettik jelide taraǵan kadrlardan las sýdyń ózenge qaraı jylǵa bolyp aǵyp jatqanyn kórýge bolady.
Saryaǵash aýdandyq máslıhatynyń málimetinshe, bıyl qyrkúıek pen qazan aılary aralyǵynda Kókterek kentinde ornalasqan shıpajaı basshylarynyń demeýshiligimen 3 sorǵy, 250 kvt-tyq bir transformator, káriz qudyǵy ornatylǵan.
— Káriz sýy jınalatyn kól dambasynyń deńgeıin kóterý jumysy júrgizilip, sarqyndy sýdyń deńgeıi 1 metrge deıin túsirildi. Káriz beketindegi qubyrlar tolyq jańartyldy. Qazirgi tańda káriz júıesi qalypty jumys atqaryp jatyr. Jalpy Kókterek aýyl okrýgi Kókterek kentindegi ortalyqtandyrylǵan káriz júıesin kúrdeli jóndeýden ótkizý jumysy boıynsha jalpy quny 1 mlrd 945 mln teńgege joba jasalǵan. Atalǵan jobanyń qurylysy 2018 jyly bastalyp, 2026 jylǵy jeltoqsan aıynda aıaqtaý josparlanǵan, — delingen aýdan máslıhaty usynǵan aqparatta.
Merdiger mekeme — «Saryaǵash Aman» JShS, avtorlyq qadaǵalaýshy «IMPYLS» JShS jáne tehnıkalyq qadaǵalaýshy «Stroy Inginiring» JShS.
Tapsyrys berýshi — Saryaǵash aýdanynyń turǵyn úı-kommýnaldyq sharýashylyq bólimi.
Joba sheńberinde 2018 jyly — 111,7 mln teńge, 2019 jyly — 20 mln teńge, 2020 jyly — 4,5 mln teńge jáne 2025 jyly — 198 mln teńge ǵana qarjy bólingen.
Demek, kelesi 2026 jyly máresine jetedi dep josparlanǵanymen qarjy jetispeýshiliginen jobanyń aıaqtalmaı qalý qaýpi bar. Óıtkeni káriz júıesin jóndeýge áli de 1,3 mlrd teńge qarajat kerek.
— Parlament Májilisiniń depýtaty Temir Qyryqbaevtyń aýdanǵa sapary barysynda bul másele kóterilip, qajet bolyp turǵan 1 mlrd 300 mln teńge qarjyny respýblıkalyq bıýdjet esebinen qarastyryp berýge yqpal etý suralǵan. Bul jóninde depýtat Májilis otyrysynda másele kóterip, Úkimetten qarjy surap, depýtattyq saýal joldady. Qazirgi tańda respýblıkalyq bıýdjetten qarjy bólý máselesi qarastyrylyp jatyr, — delingen aýdandyq máslıhattyń jaýabynda.
Sondaı-aq Túrkistan oblysynyń sanıtarııalyq-epıdemıologııalyq baqylaý departamenti Kelesten aqqan sýdy ishýge bolmaıtynyn málimdegen edi.