Saryaǵash sharýalary banan men papaııa ósirip, mol ónim alyp otyr
Túrkistan oblysynyń sharýalary tropıkalyq jemis aǵashtaryn jersindirdi. Saryaǵashtaǵy jylyjaıda banan men papaııa ónim berip jatyr. Tájirıbe alańynda dámi til úıiretin ózge de tropıkalyq óskinder jaıqalyp óse bastaǵan. Bul týraly «Habar» telearnasynda ótken 4 saǵattyq «Adal eńbek» telemarafonynda kórsetildi, dep habarlaıdy QazAqparat.
63 jastaǵy Tursyn Tasqoja Saryaǵashtaǵy jylyjaıynda tropıkalyq aımaq klımatyna beıimdelgen jemisterdi Qazaqstan topyraǵyna jersindirýmen aınalysady.
12 sotyq tájirıbe alańynda banan men papaıadan bólek qulpynaıdyń jańa tuqymy, kıvı, záıtún, lımon men mandarın aǵashy jaıqalyp tur.
Jylyjaıdyń topyraǵy esh qospasyz tabıǵı dárýmendermen tyńaıtylady. Osyndaı erekshe kútimniń arqasynda banan aǵashy bir jylda tamyr baılap, 4 metrge deıin boılaǵan.
Qazir ár 1,5 aıda 25 keliden asa ónim beredi.
Tsıtrýstyq jemister men jıdekterge naryqta suranys joǵary. Sondyqtan agronomdar tropıkalyq beldeýde ósetin óskinderdi kóbeıtip, qulpynaıdyń jańa tuqymyn jappaı egistikke ázirleýde.
Basty maqsat — ımportty ysyryp, saýda sórelerin otandyq tabıǵı taza ónimmen qamtý. Ol úshin sharýa kóshetterdi kóbeıtip, ózge sharýashylyqtarmen de bólisýge daıyn.
Baǵbandardyń sózinshe, elimizge jyl saıyn ózge memleketterden 150 myń tonnadan astam tsıtrýs jemisteri jetkiziledi.
Túrkistan oblysynyń agrarly aımaǵynda egistikti ártaraptandyryp, táýeldilikti azaıtýǵa bolady. Ol úshin aýdandaǵy 760 gektar jylyjaı keshenin damytýǵa ekpin berip, memlekettik qoldaý sharalaryn kúsheıtý kerek.
