Saryaǵash sanatorııinen aqqan káriz sýy Keles ózenine quıylǵan

TÚRKІSTAN. KAZINFORM — Buǵan Saryaǵash býlandyrǵysh toǵanyndaǵy aqaý sebep bolǵan. 

Áleýmettik jelide Saryaǵash aýdanynyń aýmaǵynan ótetin Keles ózenine sanatorıılerden shyǵatyn káriz sýy quıylyp jatqany jaıly aqparat tarady.

Aıbek Smaılov esimdi qoǵam belsendisi túsirgen kadrlardan sasyq sýdyń jylǵa bolyp aǵyp jatqanyn kórýge bolady.

Bir basy toǵanǵa túsip jatsa, endi bir jaǵy ózenge quıylǵan.

Saryaǵash aýdanynyń ákimdigi býlandyrǵysh toǵan arnasy buzylǵandyqtan bolǵan aqaý der kezinde qalpyna keltirilgenin jetkizdi. 

— Kókterek kentindigi káriz júıelerin teńgerimde ustap, qyzmet kórsetetin — «Saryaǵash Turmys» memlekettik kommýnaldyq kásiporny. Káriz tazalaý kesheninen shyqqan káriz sýy býlandyrǵysh toǵanǵa quıylady. Jaýyn-shashyn áserinen toǵan arnasy buzylyp, Keles ózenine qaraı baǵyttalǵan. Búgingi tańda «Saryaǵash Turmys» mamandary der kezinde tıisti tehnıkany jumyldyryp, toǵan arnasyn qalpyna keltirý jumystaryn júrgizdi. Káriz sýynyń aǵyny tolyqqandy toqtatyldy jáne kólshik jaǵalaýy ınertti materıaldar kómegimen 2 metr bıiktikke kóterildi. Búgingi kúni káriz sýy toǵan arnasynan kóterilip jatqan joq, aqaý qalpyna keltirildi, — delingen Saryaǵash aýdany ákiminiń orynbasary Murat Baıǵabylov usynǵan aqparatta.

Kazinform agenttigi Túrkistan oblysynyń tabıǵı resýrstar jáne tabıǵat paıdalanýdy retteý basqarmasyna jáne oblystyq sanıtarııalyq-epıdemıologııalyq baqylaý departamentine Keles ózenindegi jaǵdaıǵa qatysty suraý joldady. 

Aıta keteıik, budan buryn Túrkistan oblysyndaǵy asfalt-beton zaýyttarynyń basym bóligi talapqa saı emes ekenin jazǵan bolatynbyz.