Saryaǵash aınalma jolynyń qurylysy qashan jandanady
TÚRKІSTAN. KAZINFORM — Qazirgi tańda Kólik mınıstrliginiń Avtomobıl joldary komıteti tarapynan merdigerdi anyqtaý úshin konkýrs júrip jatyr.
Saryaǵash aınalma jolynyń qurylysy 2025 jyldyń sáýirinde bastalýy tıis bolǵan. Ótken jyly Úkimet otyrysynda Premer-mınıstr Oljas Bektenov atalǵan jolǵa qajetti qarjynyń máselesi sheshilgenin málimdegenimen, ákimshilik rásimderdiń sozylyp ketkenin atap ótken edi.
Jaqynda ótken Ulttyq quryltaıda Prezıdent eldegi kólik ınfraqurylymyn damytý máselesine arnaıy toqtalyp, Saryaǵash qalasy mańyndaǵy kólik qozǵalysynyń tym tyǵyz ekenin qadap aıtty. Memleket basshysy bul túıtkildi sheshýdiń naqty joly retinde bıyl Saryaǵash aınalma jolynyń qurylysy bastalatynyn jáne jumystyń sapaly ári ýaqytyly oryndalýyn tikeleı ózi baqylaýynda ustaıtynyn málimdedi.
Atalǵan joldyń strategııalyq mańyzy zor, óıtkeni ol halqy tyǵyz qonystanǵan Túrkistan oblysynyń tórt birdeı aýdanyn baılanystyrady. Bul aýmaqta 500 myńnan astam turǵyn bar. Oǵan qosa Ózbekstanmen shekaralas aımaqta ornalasqan.
Jergilikti turǵyndar men júk tasymaldaýshylar bul baǵytta kólik keptelisi jıi bolatynyn, kezek kútip ýaqyt joǵaltýdan ábden sharshaǵandaryn aıtady.
— Jetisaı men Shardara turǵyndary Shymkentke barý úshin osy bir joldy ǵana paıdalanady. Alaıda jol tar bolǵandyqtan keptelis kóp. Qytaı, Ózbekstan, Tájikstan baǵytyndaǵy tranzıttik kólikterdiń bári osy jolmen qatynaıdy. Aınalma jol salynsa, ol kólikter eldimekendi aınalyp ótetin edi, — dedi jetisaılyq turǵyn Marat Jorabekov.
Oblystyq jolaýshylar kóligi jáne avtomobıl joldary basqarmasy basshysynyń orynbasary Meıirjan Jalaıyrovtyń aıtýynsha, jańa jol óńirdiń kólik-logıstıkalyq áleýetin arttyryp, tranzıttik avtokólikterdiń kedergisiz qozǵalysyn qamtamasyz etedi ári jol qozǵalysy qaýipsizdigin edáýir jaqsartady.
— Saryaǵashtan Jetisaı baǵytyndaǵy jol respýblıkalyq mańyzy bar bolǵanymen, III sanatqa jatady jáne táýligine shamamen 3 myń avtokólikti ótkizýge múmkindigi bar. Alaıda qazirgi ýaqytta bul jolmen táýligine 18-20 myńǵa deıin kólik qatynap, shamadan tys júkteme týyndap otyr. Sonyń saldarynan kólik keptelisteri jıilep, jol-kólik apattary bolyp jatyr, — dedi ol.
Spıkerdiń aıtýynsha, Saryaǵash aınalma jolynyń jalpy uzyndyǵy — 102 shaqyrym. Aýqymdy jobanyń jalpy quny — 238,1 mlrd teńge.
— Joba aıasynda I b sanatyndaǵy tórt jolaqty jańa avtojol salynady. Ol respýblıkalyq mańyzy bar A-15 avtojolyna balama baǵyt retinde qyzmet atqaryp, Saryaǵash qalasy men oǵan irgeles aýmaqtardaǵy kólik júktemesin azaıtady. Qazirgi tańda Avtomobıl joldary komıteti tarapynan merdigerdi anyqtaý úshin konkýrstyq rásimder júrgizilip jatyr. Konkýrs aıaqtalǵannan keıin qurylys jumystary bastalady — dedi Meıirjan Jalaıyrov.
Jol qurylysy Qablanbek eldimekeninen bastalyp, Qyzylásker aýylyndaǵy «Qonysbaev» keden beketine deıin jalǵasady. Joba aıasynda 9 jolaıryq, 26 kópir, 11 temirjol ótkeli, 4 demalys alańy jáne 10 aqyly jol arkasyn salý kózdelgen.
Ulttyq sapa ortalyǵy Túrkistan fılıalynyń bólim basshysy Qaırat Shákirulynyń aıtýynsha, jańa aınalma joldyń qurylysy úsh jylǵa josparlanǵan. Bul joba Qazaqstan men Ortalyq Azııa arasyndaǵy tranzıttik áleýetti eki ese arttyrýǵa múmkindik beredi.
— Qurylys sapasyna qatań talap qoıylady. 102 shaqyrymdyq joba úsh lotqa bólinip júzege asyrylady, nátıjesinde konkýrs arqyly úsh merdigerdi anyqtaý kózdelip otyr. Jol paıdalanýǵa berilgennen keıin A-15 avtojolyndaǵy kólik júktemesi aıtarlyqtaı azaıady, — dedi ol.
Budan buryn Túrkistan oblysyndaǵy Arystanbab pen ıAsaýı kesenelerin jalǵaıtyn 4 jolaqty joldyń qurylysy qashan aıaqtalatynyn jazǵan edik.