Saryaǵash ákimdigi Bolat Nazarbaevtyń isin jeleý etip, basqa kásipkerdiń shıpajaıyn tartyp alǵan — Perýashev

ASTANA. KAZINFORM — Májilis depýtaty Azat Perýashev Bas prokýrorǵa aktıvterdi qaıtarý jeleýimen reıderlikke tap boldyq degen kásipkerlerdiń shaǵymdaryn joldady.

— Májilistegi «Aqjol» fraktsııasy adal jumys istep júrgen bıznesti reıderlik jolmen tartyp alý faktileri týraly, onyń ishinde aktıvterdi qaıtarý jeleýimen tartyp alý faktileri jóninde ondaǵan saýal joldaǵanyn eske salýǵa májbúrmin. Mysaly, marqum Bolat Nazarbaevtyń aktıvterin qaıtarý jeleýimen Saryaǵash aýdandyq ákimi múlde basqa kásipkerler Qarjy mınıstrliginiń ashyq aýktsıonynan satyp alǵan sanatorııdi sot arqyly tartyp aldy. Esesine Bolat Nazarbaevtyń ózine nysandardy shýsyz qaıtaryp bergen. Basqa da mysaldar boldy. Ókinishke qaraı, ol saýaldardyń bárine birdeı memlekettik organdar tıisti deńgeıde nazar aýdarǵan joq. Sondyqtan biz Bas prokýratýranyń Prezıdent Joldaýynan keıin atalmysh sanatorıı isi boıynsha birden qarsylyq bildirgenin joǵary baǵalaımyz, — dedi depýtat.

Azat Perýashev osyǵan uqsas saýaldardy Qostanaıdan, Aqtaýdan, Tarazdan túsken shaǵymdar boıynsha joldaǵandaryn eske saldy.

— Prezıdent Joldaýyn oryndaý aıasynda «Aqjol» fraktsııasy Bas prokýratýraǵa buǵan deıin aktıvterdi qaıtarý jeleýimen reıderlikke tap bolǵan adal kásipkerler týraly saýaldaryn qaıtalap joldaıdy, — dedi Azat Perýashev.

Aıta keteıik, Májilis Qurylys kodeksiniń jobasyn birinshi oqylymda maquldady.