Sardobadaǵy apat: 17 adamǵa qatysty qylmystyq is qozǵaldy
TAShKENT. QazAqparat – Ózbekstannyń Sardoba sý qoımasyndaǵy apatqa jol bergen 17 azamattyń ústinen qylmystyq is qozǵaldy. Bul týraly Ózbekstan Respýblıkasy Sybaılas jemqorlyqqa qarsy kúres agenttiginiń dırektory Akmal Býrhonov málimdedi, dep habarlaıdy QazAqparat ÝzA ulttyq aqparat agenttigine silteme jasap.
«Qazirgi ýaqytta tergeý organy bógetti jobalaý, salý jáne paıdalaný jumystarynda olqylyqtarǵa jol bergen 17 tulǵany anyqtady. Onyń ishinde: tapsyrys berýshi «Sırdare sýv qýrılısh ınvest», jobalaýshy «UzGip» JShQ, bas merdiger «Ýztemırıýlkýrılıshmontaj», «Rezaksoı sýv kýrılısh», «Omad Dýbl» JShQ, «Sarıosıe qýrılısh» JShQ, «Trans Servıs Kompleks» JShQ, «Týpalang Sherobod», Sý sharýashylyǵy mınıstrligi jáne keshendi paıdalaný dırektsııasynyń laýazymdy tulǵalary Ózbekstan Respýblıkasy Qylmystyq kodeksiniń 167, 203, 205, 207, 209, 258 baptaryna sáıkes aıyptalýda. Búginde 7 kúdikti qamaýǵa alyndy, 6 aıyptalýshy kepildikpen, 4 adam qolhatpen ýaqytsha bosatyldy», - dedi Akmal Býrhonov.
Onyń málimdeýinshe, Sardobadaǵy apatqa qatysty zertteý jumystaryn tıisti vedomstvolardyń bilikti mamandarynan quralǵan arnaıy komıssııa júrgizedi. Qazirgi tańda kinálilerdi anyqtaýmen qatar, kelgen shyǵyndy óndirip alý boıynsha sharalar qabyldanyp jatyr.
Eske sala keteıik, 2020 jyldyń 2 mamyrynda Ózbekstandaǵy Sardoba sý qoımasynyń bógeti jarylyp, eldi mekenderdi sý basyp, kommýnıkatsııalyq jeliler men egistikke zaqym kelgen edi.
Osy apatqa baılanysty qosymsha ózge de zardaptardyń aldyn alý maqsatynda taıaýda qazaqstandyq mamandar Sardoba sý qoımasyna tehnıkalyq aýdıt júrgizý úshin Ózbekstanǵa barady.
Avtor: Álıhan Asqaruly
