Sardınııa aralynan týrıst 40 keli qum men maltatas alyp ketpek bolǵan
ASTANA. KAZINFORM — Keden qyzmetkerleri Porto-Torres portynda Frantsııanyń Týlon qalasyna baratyn paromǵa mingeli turǵan 69 jastaǵy frantsýz áıeldi toqtatty. Sheteldik nómirdegi kólikti tekserý kezinde oryndyqtardyń astynan qum, maltatas, iri tastar men ulý qabyrshaqtary tabylǵan, dep habarlaıdy Bild.
Italııa bıliginiń málimetinshe, týrıst bul zattardyń bárin Sardınııanyń soltústik-batysyndaǵy Le Salıne dı Stıntıno jaǵajaıynan jınaǵan. Bul aımaq aq qumy jáne ashyq tústi maltatastarymen tanymal. Alaıda mundaı «kádesyılardy» araldan alyp shyǵýǵa zańmen tyıym salynǵan.
Áıelge 500-den 3000 eýroǵa deıin aıyppul salynýy múmkin. Tárkilengen qum, tastar men ulý qabyrshaqtary ázirge Porto-Torres kedeninde saqtaýly, keıin olardy jaǵajaıǵa qaıtarý josparlanyp otyr.
Aıta keteıik, Túrkııa kedeni tórt aıda 750 mln dollarlyq kontrabandanyń jolyn kesti.
