Sardınııa jaǵalaýynda 390 jolaýshysy bar keme apatqa ushyrady
ASTANA. QazAqparat - Senbi kúni keshkisin Italııanyń Sardınııa aralyndaǵy Porto-Torres portynan shyqqan keme apatqa ushyrady. Bul týraly SardiniaPost basylymy habarlady.
Barselonaǵa bet túzegen Cruise Roma kemesinde 390 jolaýshy bolǵan. Grimaldi Lines kompanııasyna tıesili keme ashyq teńizge shyqqan boıda ekıpaj músheleri sol jaq eskish vınttiń valynda aqaý baryn baıqap qalyp, kemeni toqtatqan. Kapıtan port basshylyǵy men jaǵalaý kúzet qyzmetine habar berip, apatty óz kúshimen joıýǵa sheshim qabyldaıdy.
Krýız qatysýshylary tótenshe jaǵdaıǵa alańdap, týystaryna, túrlishe memlekettik qyzmetterge habarlasa bastaǵan.
Birneshe saǵatqa sozylǵan jóndeý jumystarynan keıin aqaýdy retteýdiń sáti tústi. Biraq Cruise Roma Barselonaǵa emes, Rım provıntsııasyndaǵy Chıvıtavekkıa portyna qaraı bet aldy.
