«Sardar» olımpıadasy Qazaqstannyń áskerı oqý oryndaryna túsetin úzdik úmitkerlerdi anyqtaıdy
ASTANA. QazAqparat - Búgin ІІ respýblıkalyq «Sardar» keshendi olımpıadasynyń resmı ashylý saltanaty ótti. Respýblıkalyq áskerı mektep-ınternattarynyń, oblystyq áskerı mektepter men elimizdiń jalpy bilim berý mekemeleri túlikteriniń qatysýymen ótetin shara sáýir aıynyń 12-ne deıin jalǵasady.
«Sizderdi ІІ respýblıkalyq «Sardar» olımpıadasynyń ashylýymen quttyqtaımyn. Barlyq túlekterdiń elimizdiń laıyqty otan qorǵaýshylary bolýyna shyn júrekten tilektespin. Olımpıadanyń basty maqsaty -Otanǵa shyn berilgen, patrıot, zerek talantty jastardy anyqtaý», - dep atap ótti ashylý saltanatynda sóz alǵan general-maıor Talǵat Muhtarov.
Olımpıada elimizdegi azamattyq jáne áskerı mektep túlekteriniń jeke damýyna, elimizdegi áskerı qyzmet pen Qarýly Kúshterdiń abyroıyn arttyrýǵa yqpal etedi.Onyń aıasynda jastardyń Qazaqstandyq joǵarǵy áskerı oqý oryndaryna túsýge daıarlyǵy tekseriledi.
Qazaqstannyń barlyq oblystarynan, Almaty jáne Astana qalalarynan kelgen 60-tan asa jas órender eki kún boıy teorııalyq jáne praktıkalyq bilimderin synaqta kórsetedi. Aldymen fızıka, matematıka, qazaq (orys) tili jáne alǵashqy áskerı daıarlyq pánderi boıynsha testileý tapsyrmalaryn oryndap, dene jáne áskerı-qoldanbaly daıarlyqty baıqatady. Onyń ishinde 3 000 m, 100 metrge júgirý jáne ishti qataıtý, jeke saptyq daıarlyq, AK-74 avtomatyn bólshekteý jáne qurastyrý boıynsha synaqtar tapsyrady.
«Sardar» olımpıadasy Astanadaǵy armııa generaly Saǵadat Nurmaǵambetov atyndaǵy respýblıkalyq «Jas ulan» mektebiniń bazasynda ótýde. Aldaǵy ýaqytta olımpıadany Almaty, Qaraǵandy jáne Shymkent qalalaryndaǵy respýblıkalyq áskerı mektep-ınternant bazalarynde kezekpe-kezek ótkizý qaralady.
