«Sardar» ІІ áskerı olımpıadasyna elimizdiń túkpir-túkpirinen 60-qa jýyq oqýshy qatysady

ASTANA. QazAqparat - Uly Jeńistiń 70 jyldyq mereıtoıyna oraı QR Bilim jáne ǵylym mınıstrliginiń «Daryn» respýblıkalyq ǵylymı-praktıkalyq ortalyǵy Qorǵanys mınıstrliginiń bilim jáne ǵylym departamentimen birlese otyryp, bilim berý uıymdarynyń 11-shi synyp oqýshylary arasynda «Sardar» respýblıkalyq keshendi olımpıadasyn ótkizbek, dep habarlaıdy atalmysh ortalyqtyń baspasóz qyzmetinen.

Bilim dodasynyń maqsaty - óskeleń urpaqtyń boıynda otanshyldyq pen ulttyq patrıotızmdi qalyptastyrý.

«Sardar» respýblıkalyq keshendi olımpıadasy 10-12 sáýir aralyǵynda Astanadaǵy QR Qorǵanys mınıstriliginiń general S.Nurmaǵanbetov atyndaǵy «Jas ulan» respýblıkalyq mektebiniń bazasynda ótkiziledi.Olımpıadaǵa respýblıkamyzdyń túkpir-túkpirinen 60-qa tarta oqýshylar men olardyń ustazdary qatyspaq.

Olımpıada eki týrda ótkiziledi. Birinshi teorııalyq týrda fızıka, matematıka, orys tili, qazaq tili jáne bastapqy áskerı daıyndyq boıynsha testileý bolady. Al praktıkalyq týr alǵashqy áskerı daıyndyq jáne dene shynyqtyrý boıynsha normatıvterdi oryndaý: jeke saptyq daıyndyǵyn, AK-74 avtomatyn bólshekteý jáne qurastyrý, kross 1000 m, 100 m júgirý jáne kópir aǵashyna tartylý boıynsha ótkizilmek.

Olımpıada baǵdarlamasy aıasynda Uly Otan soǵysy ardagerlerimen, aýǵanstandyq ardagerlermen kezdesýler ótkiziledi. Alǵashqy áskerı daıyndyq pániniń muǵalimderine «Qazaqstan mektepterinde alǵashqy áskerı daıyndyq pánin oqytýdaǵy jańa kózqaras» taqyrybynda oqytý semınary uıymdastyrylady. Semınarda óz tájirıbesimen Aqmola oblysynyń Stepnogor qalasyndaǵy №6 Abaı Qunanbaev atyndaǵy mektep-gımnazııasynyń joǵarǵy sanattaǵy alǵashqy áskerı daıyndyq muǵalim-uıymdastyrýshysy A.E.Kıntsel bólisedi. Sondaı-aq Astana qalasynyń alǵashqy áskerı daıyndyq sabaǵynyń muǵalimderi shaqyryldy. Barlyǵy 30 muǵalim qatyspaq.

Tyńdaýshylar sabaqty ótkizý ádisteri, jańa ınnovatsıalyq-kommýnıkatsııalyq tehnologııalardy qoldaný, sabaq barysy kezinde sóılesý ádisterin (synyp menedjmenti) meńgerý, sonymen qatar sabaqtan tys jáne úıirmelerde týyndaıtyn suraqtar jaıly máselelerdi talqylaıdy.

Olımpıada qatysýshylarynyń QR QM 68665 ákerı bólimine jáne QR Ulttyq murajaıyna saıahaty josparlanǵan. Shara sońynda qatysýshylarǵa QR QM qurmetti qaraýyldar rotasynyń áskerı kórnisteri jáne áskerı qarý-jaraq jáne tehnıka mýzeıi kórsetiledi.

Olımpıadanyń jeńimpazdary men júldegerlerine QR QM men «Daryn» RǴPO-nyń I, II, III dárejeli dıplomdary men gramotalary beriledi. Barlyq qatysýshylarǵa sertıfıkattar tabystalady.

Olımpıadanyń saltanatty ashylýy 10 sáýir kúni saǵat 12.00-de «Jas ulan» respýblıkalyq mektebinde ótkizilmek.