Sarbazdyń jaǵyn syndyrǵan boryshtasy aıyppulmen qutylýy múmkin — zańger pikiri

ASTANA. KAZINFORM — Otardaǵy áskerı bólimde soqqyǵa jyǵylyp, jaǵy synǵan sarbaz Esbol Qapar isi jáne osy iske qatysty kúdiktiniń zań aıasyndaǵy jaýapkershiligi týraly zań ǵylymdarynyń doktory, professor Aısana Sman pikir bildirdi.

Mamannyń sózinshe, mundaı isterde aldymen sot-medıtsınalyq saraptama taǵaıyndalyp, jaraqattyń qanshalyqty aýyr deńgeıde ekeni anyqtalady. 

Sonymen qatar, kúdikti quqyqbuzýshylyqty qandaı nıetpen, qandaı jaǵdaıda, neshe adam bolyp jasaǵany jáne t. b. faktorlar eskeriledi. Tergeý barysynda osy sekildi faktiler men dálelderdi jınaǵan soń, QR QK Áskerı polıtsııasy is materıaldaryn sotqa jiberedi. Túpkilikti sheshimdi sot qabyldaıdy.

— Atalǵan iste kúdikti QR Qylmystyq kodeksiniń myna baptary boıynsha jaýapkershilikke tartylýy yqtımal: 106-bap (Densaýlyqqa qasaqana aýyr zııan keltirý); 107-bap (Densaýlyqqa qasaqana aýyrlyǵy ortasha zııan keltirý); 108-bap (Densaýlyqqa qasaqana jeńil zııan keltirý); 109-bap (Uryp-soǵý). Bul is osy baptardyń qaısysyna jatatynyn tergeý anyqtaıdy. Sot kúdiktige qylmysynyń aýyrlyǵyna baılanysty aıyppul, qoǵamdyq jumys nemese bas bostandyǵynan aıyrý túrindegi jaza taǵaıyndaýy múmkin, — deıdi A. Sman.

Sondaı-aq zańger jábirlenýshiniń materıaldyq shyǵyndy óndirip alýǵa quqyly ekenin atap ótti.

Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi.

Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.

Sonymen qatar, buǵan deıin Otardaǵy áskerı bólimde jaǵy synǵan sarbazdyń jaǵdaıy týraly jazǵanbyz.

Adam quqyqtary jónindegi ýákil Otarda jaǵy synǵan sarbazǵa qatysty pikir bildirdi.

Qorǵanys mınıstrliginiń baspasóz qyzmeti osy oqıǵaǵa baılanysty úsh komandır men orynbasary qyzmetinen bosatylǵanyn málim etti.

Al kúdikti retinde jábirlenýshiniń boryshtasy aıyptalyp, ústinen qylmystyq is qozǵalǵanyn habarlaǵan edik.