Sarbazdarǵa nesıe berýge tyıym: zańdy buzǵan bankterge qandaı jaýapkershilik qarastyrylǵan
ASTANA. KAZINFORM — Elimizdegi bankter men shaǵyn qarjy uıymdary merzimdi áskerı qyzmetin atqaryp júrgen azamattarǵa nesıe berýge zańnamalyq tyıymdy saqtaýǵa mindetti. Bul jóninde Qarjy naryǵyn retteý jáne damytý agenttigi tóraǵasynyń orynbasary Oljas Qızatov málimdedi.
Onyń sózinshe, bankter men shaǵyn qarjy uıymdaryna merzimdi áskerı qyzmettegi sarbazdarǵa nesıe berýge tyıym salatyn zań normasy bar.
Al baqylaý mehanızmi Memlekettik nesıe bıýrosy arqyly júrgiziledi.
— Bul normany iske asyrý úshin Memlekettik nesıe bıýrosy bankterge merzimdi áskerı qyzmettegi azamattar týraly derekterdi usynady. Eger azamat osy tizimde bolsa, onda avtomatty túrde nesıe berilmeıdi, — deıdi Oljas Qızatov.
Eger qarjy uıymdary bul erejeni buzsa, olarǵa qadaǵalaýshy sharalar qoldanylýy múmkin.
Mamannyń aıtýynsha, mundaı nesıelerdiń kúshi joıylýy da yqtımal. Sebebi, qazirgi zańnamaǵa saı kelmeıdi.
Sonymen qatar, merzimdi áskerı qyzmettegi azamattarǵa qarjylyq qorǵaý baǵdarlamasy da qarastyrylǵan. Ol merzimdi áskerı qyzmet ýaqytynda qaryz júktemesin tómendetýge múmkindik beredi.
Aıta keteıik, buǵan deıin qarjy naryǵyn retteý jáne damytý agenttigi elimizdegi lombardtar qyzmetine talapty kúsheıtýdi josparlap otyrmaǵanyn jazǵanbyz.
