Sarbazdarǵa arnalǵan «Otbasymen beıneqońyraý» qyzmeti engizildi

NUR-SULTAN. QazAqparat - Bul joba birinshi ret elordanyń desanttyq-shabýyldaý quramasynda iske qosyldy, dep habarlaıdy QazAqparat.

Qorǵanys mınıstri general-polkovnık Rýslan Jaqsylyqovtyń tapsyrmasymen áskerı boryshyn ótep júrgen sarbazdar ata-analaryn kórip, tildesýi úshin «Otbasymen beıneońyraý» qyzmeti uıymdastyryldy. Desanttyq-shabýyldaý quramasynda ótken pılottyq telekópir Qarýly Kúshterdiń barlyq áskerı bólimderinde ótkizý oryndy ekenin kórsetti.

Birinshi beıne baılanysqa áskerı bólimniń basshylyǵy, merzimdi qyzmettegi jaýyngerler jáne olardyń ata-analary qatysty. Baǵdarlamaǵa 30-dan astam abonent qosyldy.

«Otbasymen beıneýqońyraý» telekópiri kezinde sarbazdar ózderiniń jaqyndaryn kórip, áskerı qyzmetten alǵan áserlerin jáne meńgergen jetistikterin aıtyp jatty.

Bólim basshylyǵy usynǵan aqparat ta erekshe qyzyǵýshylyq týdyrdy. Brıgada komandıri polkovnık Nurlan Káribaev desantshylar qyzmetiniń erekshelikterin sóz etse, bólim komandıriniń tárbıe jáne ıdeologııalyq jumystar jónindegi orynbasary podpolkovnık Talǵat Qulmanov demalysty uıymdastyrý jáne áleýmettik qamsyzdandyrý jóninde aıtyp ótti. Odan ózge brıgada basshylyǵy merzimdi qyzmettegi áskerı qyzmetshilerdi, onyń ishinde dala jaǵdaıynda tamaqtandyrý máselelerin, sondaı-aq jaýyngerlerdiń densaýlyǵyn qorǵaý tóńireginde ótkiziletin mindetti is-sharalardy talqylady.

Búginnen bastap Qarýly kúshterdiń barlyq áskerı bólimderinde «Otbasymen beıneqońyraý» turaqty túrde iske qosylatyn bolady.

Foto : gov.kz