Sarbazdardyń psıhıkalyq jaǵdaıyn jasandy ıntellektiniń kómegimen anyqtaıdy

ASTANA. KAZINFORM – Ulttyq ulanda jasandy ıntellektiniń kómegimen psıhologııalyq testileý júıesi engiziledi.

Ulttyq ulannyń Bas qolbasshylyǵynda áskerı ortada psıhologııalyq máselelerdi anyqtaýǵa arnalǵan zamanaýı tehnologııalardy engizý boıynsha is-shara ótti. Jıyn barysynda ázirleýshiler beıimdelgen ıntellektýaldy psıhologııalyq testileý júıesin tanystyrdy.

– Zamanaýı tehnologııalar psıhologııa men mentaldyq saýlyq salasynda jańa múmkindikterge jol ashady. Ol emotsıonaldyq jaısyzdyqtyń alǵashqy belgilerin der kezinde anyqtaýǵa jáne ýshyǵýdyń aldyn alýǵa kómektesedi. Maqsat – árbir áskerı qyzmetshige ýaqytyly kómek kórsetýdi qamtamasyz etetin tıimdi erte anyqtaý jáne qoldaý júıesin qurý, – dedi Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary Qaırat Úmbetov. 

Onyń aıtýynsha, jasandy ıntellektti qoldaný áskerı ortadaǵy psıhologııalyq qıyndyqtardy erte kezeńde anyqtaýǵa múmkindik beredi. 

Jobany ázirleýshi Erǵalı Mábıevtiń málimdeýinshe, júıe synaqtan ótýshiniń jaýaptaryna sáıkes suraqtardyń mazmuny men kúrdelilik deńgeıin dınamıkalyq túrde ózgertip otyrady. Bul ádis dástúrli testileý tásilderine qaraǵanda adamnyń psıhologııalyq jaǵdaıyn anaǵurlym dál jáne tıimdi baǵalaýǵa múmkindik beredi. Óıtkeni, artyq suraqtar qysqartylyp, mańyzdy aspektilerge nazar aýdarylady. Málimetterdiń qaýipsizdigin qamtamasyz etý maqsatynda júıe áskerı bólimderdiń serverlerinde lokaldy túrde ornalastyrylady.

Jańa júıe elordadaǵy garnızonnyń áskerı bólimderinde boryshyn ótep jatqan sarbazdar arasynda júrgiziledi.

Aqparatta aıtylǵandaı, atalǵan tehnologııany engizý – áskerı qyzmetshilerdiń qaýipsizdigin qamtamasyz etýdiń jáne áskerı bólimderde moraldyq-psıhologııalyq klımat qalyptastyrýdyń mańyzdy qadamy bolmaq. 

Aıta ketsek, Qazaqstannyń áskerı oqý oryndary eGov.kz portaly arqyly onlaın ótinim qabyldaı bastady.