Sarbazdardyń qaýipsizdigin JI baqylaıdy: Qorǵanys mınıstrligi vıdeoanalıtıka júıesin engizýde
ASTANA. KAZINFORM – Qazaqstan Qorǵanys mınıstrligi áskerı bólimderde jasandy ıntellekt negizindegi vıdeoanalıtıka júıesin engizýdi qolǵa aldy. Bul júıe sarbazdardyń qaýipsizdigin arttyryp, tótenshe jaǵdaılardyń aldyn alý úshin táýlik boıy baqylaý júrgizýge múmkindik beredi. Bul týraly Kazinform tilshisine Qarýly kúshter Bas shtaby tárbıe jáne ıdeologııalyq jumys departamentiniń bastyǵy, polkovnık Tileýhan Basqojaev aıtty.
Polkovnıktiń aıtýynsha, tsıfrlyq tehnologııalar baqylaý múmkindikterin aıtarlyqtaı keńeıtkenimen, áskerı ortadaǵy jarǵyǵa saı emes qatynastardy túbegeıli joıa qoıǵan joq.
– Keıbir jaǵdaılarda tártip buzýshylar beınekamera kórmeıtin «soqyr aımaqtardy» paıdalanady. Mundaı oqıǵalar kóbine beınebaqylaý múmkin emes jerlerde, mysaly, sanıtarlyq toraptarda tirkeledi. Biz kameralardy barlyq jerge ornata almaımyz, sebebi jeke keńistik aımaqtary bar. Ókinishke qaraı, buny keıbir áskerı qyzmetshiler teris maqsatta paıdalanady, – dedi ol.
Sonymen qatar, Basqojaevtyń aıtýynsha, adam faktory da sheshýshi ról atqarady. Kameralar men tsıfrlyq baqylaý quraldary tártipti kúsheıtedi, biraq moraldyq mádenıet tómen bolǵan jaǵdaıda másele saqtalyp qala beredi.
Qorǵanys mınıstrligi ázirlep jatqan jańa júıe – jasandy ıntellekt kómegimen birtutas jelige biriktiriletin vıdeoanalıtıka. Ol tóbeles, urlyq, qarýdy durys paıdalanbaý sekildi jaǵdaılardy avtomatty túrde anyqtaıdy. Bul sharalar BAÁ men Ońtústik Koreıa tájirıbesine uqsas jáne jarǵyǵa saı emes qatynastardyń aldyn alýǵa baǵyttalǵan.
– 2019 jyldan beri el boıynsha qylmys deńgeıi shamamen 50 paıyzǵa tómendedi. Bul – profılaktıkalyq sharalardyń tıimdiligin kórsetedi. Alaıda, eń bastysy – ózge eldiń tájirıbesin kóshirmeı, ony ulttyq erekshelikke beıimdeý jáne nóldik tózimdilik qaǵıdatyn dáıekti túrde engizý, – dedi Basqojaev.
Polkovnıktiń aıtýynsha, árbir oqıǵa komandırdiń jaýapkershiligi turǵysynan jeke qaralady. Eger olardyń tarapynan salǵyrttyq nemese baqylaýsyzdyq anyqtalsa, qyzmetinen bosatý, shenin tómendetý nemese qylmystyq jaýapkershilikke tartý sharalary qoldanylady.
– Ár sarbazdyń ómiri men densaýlyǵy úshin komandır tikeleı jaýap beredi. Prezıdent te birneshe ret atap ótkendeı, ata-analar óz uldaryn memleketke senip tapsyrady, sondyqtan olardyń qaýipsizdigi úshin armııa basshylyǵy erekshe jaýapkershilik kóteredi, – dedi ol.
Budan bólek, sarbazdar men ata-analardyń shaǵymdary men ótinishterin qabyldaý úshin «jedel jeliler» men senim telefondary jumys isteıdi. Olardyń kómegimen áskerı qyzmetshiler men týystary máselelerdi qaýipsiz ári jasyryn túrde jetkize alady. Sondaı-aq «Otbasymen beıneqońyraý» jobasy iske qosylǵan, ata-analar balalarymen tikeleı baılanys ornata alady.
Qazirgi tańda Qorǵanys mınıstrligi 320 áskerı psıholog qyzmetkerin jumysqa tartqan. Olar jyl saıyn 120 myńǵa jýyq jas azamatty psıhologııalyq irikteýden ótkizedi, olardyń shamamen 1 paıyzy psıhıkalyq sebeptermen áskerı qyzmetke jaramsyz dep tanylady.
Mınıstrliktiń málimetinshe, búginde barlyq áskerı bólim men mekemeler beınebaqylaý júıesimen tolyq qamtylǵan.
Vedomstvo ókilderi atap ótkendeı, tártip pen qaýipsizdik tek tehnologııalar arqyly emes, eń aldymen adam sanasy men mádenıetine súıenedi.
«Qaı jerde komandır ádil ári talapshyl bolsa, sol jerde jarǵyǵa saı emes qatynas bolmaıdy», – dedi polkovnık Tleýhan Basqojaev.
Aıta keteıik, Ulttyq ulanda alǵash ret «aǵa sarbazdar» ınstıtýty engizildi.