Sarbazdar júkti áıeldi ólimnen qutqaryp qaldy
Aıaq astynan esinen tanyp qalǵan júkti áıelge 6506 áskerı bóliminiń serjanty Kenjetaı Otarbaı men qatardaǵy jaýynger Turar Ýahıt der kezinde kómek kórsetti.
QR Ulttyq ulany baspasóz qyzmetiniń málimetine qaraǵanda, áskerı qyzmetshiler sol kúni ádettegideı patrýldik-kezekshilik mindetin atqaryp júrgen. Olar kestege sáıkes Mádeli qoja kóshesimen kele jatyp, jol jıeginde esinen tanyp jatqan áıeldi baıqap qalady. Serjant Kenjetaı Otarbaı dereý ekiqabat áıeldiń júrek tusyn ýqalap, jasandy tynys alýyna kómektesken. Osy kezde janyndaǵy sarbaz jedel járdem qyzmetin shaqyrtqan. Der kezinde alǵashqy medıtsınalyq kómek kórsetýdiń arqasynda kelinshek esin jıyp, oblystyq aýrýhanaǵa jetkizildi.
Dárigerlerdiń aıtýynsha, júkti áıel tıisti emderin qabyldaýda. Onyń densaýlyǵy men ishindegi sharanasyna eshbir qaýip joq.