Sarbazdar men Ulttyq ulanǵa qyzmetke ornalasýǵa nıettilerdiń psıhologııalyq jaǵdaıyn arnaıy apparat anyqtaıtyn bolady (FOTO)

ASTANA. QazAqparat - Áskerı psıhologtarǵa arnaıy apparat berildi. Budan bylaı Ulttyq ulan qataryna qyzmetke ornalasýǵa nıettilerdiń taǵdyryn osy qurylǵy sheshetin bolady. Sebebi, mamandardyń aıtýynsha ol azamattardyń áskerı qyzmetke moraldyq jáne psıhologııalyq turǵydan qanshalyqty daıyn ekenin 85% anyqtaı alady.

Búgin Qazaqstan Respýblıkasy Ulttyq ulanynyń Bas qolbasshylyǵyna Sankt-Peterbýrg qalasynyń «Bıotehprogress» AAQ jáne Almaty qalasynyń «Psıhologııalyq qaýipsizdiktiń zerthanasy» JShS-niń ǵylymı qyzmetkerleri arnaıy keldi. Olar memlekettik organdar men basqa da salalarda psıhologııalyq testileýde keń qoldanylyp júrgen gazdyrazrıadtyq vızýalızatsııa ádisi apparatymen tanystyrdy, dep habarlady Ulttyq ulan baspasóz qyzmeti.

Elimizde bul qural-jabdyqtyń tanystyrylymy alǵash ret ótkizilip otyr. Tanystyrylym sharasy Ulttyq ulannyń óńirlik qolbasshylyqtary, Áskerı ınstıtýty jáne áskerı bólimderiniń psıholog mamandarynyń basyn qosqan oqý-ádistemelik jıynǵa sáıkes keldi. Qurylǵynyń erekshelikterimen Qazaqstan Respýblıkasy Bas prokýratýrasy, Qorǵanys mınıstrligi, UQK Shekara qyzmeti, ІІM psıhologııalyq qyzmet ókilderi, osy salada maman daıarlaıtyn elordalyq joǵarǵy oqý oryndarynyń ustazdary men stýdentteri de tanysty.

Sankt-Peterbýrgte jasalǵan bul apparattyń quny 7000 AQSh dolllaryna jýyqtaıdy. Aqyldy apparattyń eki danasy reseılik óndirýshilermen tyǵyz baılanys ornatqan «Psıhologııalyq qaýipsizdiktiń zerthanasy» JShS tarapynan Ulttyq ulanǵa syıǵa tartyldy. «Biz apparattyń birin áskerı-medıtsınalyq komıssııaǵa tabystaımyz. Óıtkeni, ásker qataryna moraldyq turǵydan myqty, deni saý mamandar irikteýge jáne Otan aldyndaǵy boryshyn óteýge kelgen jaýyngerlerdiń psıhologııalyq jaǵdaıyn anyqtaýǵa kóp septigin tıgizedi degen oıdamyz», - dedi Ulttyq ulan Bas qolbasshysynyń orynbasary polkovnık Muhametqalı Satov. Al, ekinshi danasy áskerdiń jeke quramy jaǵynan eń úlken quramasy - Ilınka kentinde ornalasqan 5573 áskerı bólimine beriledi.

«Reseı jáne ózge elderde qoldanylatyn psıhologııalyq testileý ádisiniń maqsaty - jan kúızelisi saldarynan týyndaıtyn túrli negatıvti áreketterdi joıý. Bul tehnıka dıagnostıkalyq qurylǵy emes. Dıagnozdy naýqasqa tek dárigerler qoıady. Alaıda, áskerı psıhologtarǵa sýıtsıdke beıim sarbazdardy anyqtap, soǵan oraı jumys istep, júıke tynyshtyǵyn qaıta qalyptastyrýǵa kómekteseri sózsiz. Protsedýraǵa bar bolǵany 10-15 mınýt ketedi, aǵzaǵa eshqandaı aýyrtpalyǵy men zııany joq», - dedi «Bıotehprogress» AAQ bas dırektory Ramız ıÝsýbov.

Joǵaryda atalǵan ádistiń negizinde qyzmetkerdiń aldyna qoıylǵan mindetter men maqsattardy oryndaý qabyletin sapaly baǵalaýǵa múmkindik beredi. Adamdardyń ózara sáıkestigi deńgeıin anyqtaý, ujymda bolatyn keleńsizdikterdiń aldyn alýǵa jáne jumys ornyndaǵy psıhologııalyq ahýaldyń jaqsarýyna múmkindik beredi. Ulttyq ulan basshylyǵy qoǵam tynyshtyǵyn kúzetken quqyqtyq tártip áskerin qundy qurylǵymen qamtamasyz etkeni úshin delegatsııaǵa alǵys bildirdi.