Sarbazdar Qazaqstannyń joǵary oqý oryndaryna túsýge daıyndalyp jatyr

ALMATY. QazAqparat - Qazaq qatynas joldary ýnıversıtetiniń, Narxoz ýnıversıtetiniń, Qurlyq áskerleriniń áskerı ınstıtýtynyń, sondaı-aq Radıoelektronıka jáne baılanys áskerı-ınjenerlik ınstıtýtynyń ókilderi Almaty oblysyndaǵy baılanys áskerleriniń oqý ortalyǵynda boldy, dep habarlaıdy QazAqparat.

Qorǵanys mınıstrliginiń málimetinshe, merzimdi qyzmettegi sarbazdarǵa oqý oryndaryna túsý sharttary, mamandyqtary, ásker mektebinen ótkenderdiń múmkindikteri men artyqshylyqtary týraly aıtyldy.

«Áskerge deıin temirjolda jumys istedim. Qyzmetten keıin Qazaq qatynas joldary ýnıversıtetine túsýdi josparlap otyrmyn. Osy ýnıversıtet ókilderimen kezdesýdiń arqasynda kóptegen máselelerdi túsindim. Endi oqýǵa grant alý úshin ózimdi kórsetýge tyrysamyn», – dedi qatardaǵy jaýynger Bektur Orynbekov.

Jaýyngerlik jáne memlekettik-quqyqtyq daıarlyqtan úzdik nátıje kórsetip júrgen, bólimsheniń qoǵamdyq ómirinde belsendi jáne tártipti merzimdi qyzmettegi sarbazdary elimizdiń oqý oryndarynda tegin joǵary bilim alatynyn aıta keteıik.

Bıyl elimizdiń Qorǵanys mınıstrligi men joǵary oqý oryndarynyń belgilengen merzimde qyzmet etken áskerı qyzmetshilerge tegin joǵary bilim alý múmkindigin berý jónindegi kelisimderi kúshine endi. Onda yntymaqtastyq baǵyttarymen qosa, joǵary oqý oryndaryna konkýrssyz túsý úshin jyl saıyn bólinetin oryndar sany da belgilengen.

Jýyrda oqý ortalyǵynda Qazaq ulttyq tehnıkalyq ýnıversıteti men Almaty energetıka jáne baılanys ınstıtýtynyń ókilderimen kezdesýler ótpek.

Foto: gov.kz