Sarbazdar 1,875 mlrd teńge kredıtti tóleýge «demalys» aldy
Qazir elimizde merzimdik áskerı boryshyn ótep júrgen sarbazdarǵa bankten alǵan qaryzy men shaǵyn nesıelik tólemderin keıinge qaldyrý tájirıbesi qoldanylyp keledi. Buǵan Qorǵanys mınıstrligi men QR Qarjy naryǵyn retteý jáne damytý agenttigi arasyndaǵy kelisimniń nátıjesinde qol jetkizildi, dep habarlaıdy Kazinform.
Qorǵanys mınıstrliginiń málimetine súıensek, qazirgi kezde 5 myńnan astam sarbazdyń jalpy somasy 1 mlrd 875 mln teńgeni quraıtyn nesıesi keıinge qaldyryldy.
«Qazirgi ýaqytta bankter men mıkrokredıttik uıymdarda 1,6 mlrd teńge somasyna 5 myńǵa jýyq áskerı qyzmetshiniń ótinishteri qaralyp jatyr.
Qorǵanys vedomstvosynyń bul bastamasy zań júzinde bekitýdi jáne múddeli uıymdardyń birlesken tehnıkalyq sheshimin talap etedi.
Qorǵanys mınıstrligi sarbazdar úshin áleýmettik qoldaý sharalaryn zań turǵysynda retteý maqsatynda «Áskerı qyzmet jáne áskerı qyzmetshiniń mártebesi týraly» QR Zańyna 50-1-bapty engizýge bastamashy boldy. Zań jobasy Parlament Májilisinde qaralyp jatyr.
Budan ózge, Qorǵanys mınıstrligi QR Qarjy naryǵyn retteý jáne damytý agenttigine «Bankter jáne bank qyzmeti týraly» QR Zańynyń 34-babyna jáne «Mıkroqarjylyq qyzmeti týraly» QR Zańynyń 7-babynyń 2-tarmaǵyna tolyqtyrýlar engizý jóninde usynystaryn bildirdi», - delingen mınıstrlik habarlamasynda.
Qorǵanys mınıstrligi, sondaı-aq áskerı jıyndarǵa shaqyrylatyn zamattarǵa da osyndaı jeńildikter berýdi usynyp otyr.
«Nesıeni keıinge qaldyrý áskerı jıyndaǵy búkil kezeńge beriledi dep kútilýde. Bul rette málimet almasý múddeli organdardyń aqparattyq júıeleriniń ózara is-qımyly arqyly júzege asyrylýǵa tıis.
Protsesterdi avtomattandyrý úshin Uıymdastyrý-jumyldyrý jumysy departamenti Qarjy naryǵyn retteý jáne damytý agenttigimen jáne «Memlekettik kredıttik bıýro» AQ-men birlesip proaktıvti formatta ózara is-qımyl algorıtmin ázirledi.
Kredıttik demalystardy avtomatty (proaktıvti) túrde berý jónindegi pılottyq joba 2024 jyly iske qosylatyn bolady. Jyl sońyna deıin zapasqa shyǵarylǵan adamdardyń nesıelik demalysyn toqtatý algorıtmi sııaqty, munda da áskerge shaqyrý kúniniń ornyna áskerı qyzmetten bosatý kúni beriledi», - dep tolyqtyrdy vedomstvodan.
