SARBAZ+ jobasy: Áskerı qyzmettiń jańa formaty iske qosyldy
ASTANA. KAZINFORM — Qorǵanys mınıstrligi jańa formattaǵy merzimdi áskerı qyzmettiń SARBAZ+ pılottyq jobasyn iske asyryp jatyr. Baǵdarlama áskerı qyzmetshilerdi daıarlaý sapasyn arttyrýǵa jáne zamanaýı tehnologııalardy kúndelikti ásker ómirine kiriktirýge baǵyttalǵan.
Osy kúzde Almaty oblysynda ornalasqan Áýe qorǵanysy kúshteriniń 78460 áskerı bóliminde 150 áskerge shaqyrylýshy jańa úlgi boıynsha qyzmet atqara bastaıdy. SARBAZ+ sarbazdardyń jeke jáne kásibı áleýetin damytýǵa, qyzmet kórsetý jaǵdaılaryn jaqsartýǵa jáne kúndelikti qyzmetti basqarýǵa tsıfrlyq quraldardy engizýge baǵyttalǵan sheshimderdi synaqtan ótkizýge arnalǵan alańǵa aınalady.
Jobany iske qosýǵa daıyndyq aıasynda bólimge Qorǵanys mınıstriniń tsıfrlandyrý jónindegi orynbasary Darhan Ahmedıev keldi. Delegatsııa quramyna Parlament Májilisiniń depýtaty Oljas Quspekov jáne «Qazaqtelekom» AQ, «Transtelekom» AQ, «BI Group» AQ, «Invictus Fitness» JShS, «Qazaqstan GAJ Ortalyǵy» AQ jáne Almaty shahmat klýbynyń seriktes kompanııalarynyń ókilderi kirdi. Qatysýshylar ınfraqurylym nysandarymen tanysyp, jańa fýtbol alańy men elektrondy tırdiń ashylýyna qatysty.
SARBAZ+ jobasy áskerı qyzmetti kásiptik oqytý elementterin, tsıfrlyq sheshimderin, medıtsınalyq monıtorıng júıesin jáne bos ýaqytty uıymdastyrýdy kiriktirýdi kózdeıdi.
— Árbir áskerı qyzmetshige naqty ýaqyttaǵy bıometrııalyq kórsetkishterdi baqylaý úshin fıtnes-bilezik beriledi dep josparlanyp otyr. Derekter medıtsınalyq personal men komandırlerge qoljetimdi ortalyqtandyrylǵan monıtorıng júıesine kelip túsedi, bul jeke quramnyń densaýlyq jaǵdaıyn turaqty baqylaýdy qamtamasyz etedi. Beıne taldaý júıesi de engizilip jatyr, — delingen mınıstrlik habarlamasynda.
Bólim aýmaǵynda qurylys jáne jóndeý jumystary aıaqtalyp jatyr. Sport nysandary jańartylyp, trenajerler ornatylýda, oıyn sport túrlerine arnalǵan alańdar men kórermenderge arnalǵan aımaqtar qurylyp jatyr. Logıkalyq oılaýdy damytý jáne zııatkerlik belsendilikti qoldaý úshin shahmat sektsııalaryn iske qosý da josparda bar.
Joba aıasynda telekommýnıkatsııa jáne IT salasynda — «Qazaqtelekom» jáne «Transtelekom» kompanııalarymen birlesip bazalyq oqytý baǵdarlamalary kózdelgen. Áskerdegi qyzmet aıaqtalǵannan keıin qatysýshylar attestattaýdan ótip, jumysqa ornalasý kezinde paıdaly sertıfıkattar ala alady. Oǵan qosa ushqyshsyz ushatyn qurylǵylar men radıobaılanysty paıdalaný negizderine oqytý josparlanǵan. Qosymsha qazaq jáne aǵylshyn tilderinde sabaqtar uıymdastyrylady.
Áskerı qyzmetshilerdiń psıhologııalyq kúıin qoldaý úshin emotsııany shyǵarý bólmesi ashylady. Ofıtserler men serjanttar úshin zamanaýı, quzyretti jáne stresske tózimdi áskerı maman qalyptastyrýǵa baǵyttalǵan jeke tulǵany damytý boıynsha trenıngter qarastyrylǵan.
SARBAZ + baǵdarlamasy merzimdi qyzmet sarbazdaryna ǵana áser etpeıdi. Bólimniń ofıtserlik jáne serjanttyq quramy da, onyń ishinde CCNA Cisco jelilik tehnologııalar salasyndaǵy halyqaralyq baǵdarlamasy boıynsha biliktiligin arttyrýdan ótedi.
Áskerge shaqyrylýshylardy irikteýdiń yńǵaılylyǵy úshin jobanyń resmı saıty ázirlendi. Platformada qyzmetke kirý tártibi, ótý sharttary jáne irikteý kezeńderi týraly aqparat ornalastyrylǵan. Áskerge shaqyrylýshylar onlaın-tirkeýden óte alady, sodan keıin olardyń saýalnamalaryn bólim ókilderi men jergilikti áskerı basqarý organdarynyń qatysýymen komıssııa qaraıdy. Іrikteýden ótken úmitkerler qabyldanǵany jaıly habarlama alady.
— SARBAZ+ — áskerı qyzmettiń úlgisi ǵana emes, sonymen qatar jeke jáne kásibı ósý múmkindigi. Biz árbir áskerge shaqyrylýshynyń azamattyq ómirde paıdaly bolatyn naqty bilim men daǵdy alyp, áskerden zapasqa shyǵýyna jumys isteımiz, — dep atap ótti Qorǵanys mınıstriniń orynbasary Darhan Ahmedıev.
Joba sátti iske asyrylǵan jaǵdaıda ony Qazaqstan Respýblıkasy Qarýly Kúshteriniń basqa da bólimshelerine kezeń-kezeńimen engizý josparlanyp otyr.
Aıta ketelik qorǵanys salasynda 1 qyrkúıekten bastap tsıfrlyq bilim berý júıesi iske qosylady.