Sarbaz komaǵa tústi: Qorǵanys mınıstrligi resmı málimdeme jasady
ASTANA. KAZINFORM – QR Qorǵanys mınıstrligi Jambyl oblysy Otar aýylyndaǵy áskerı bólimde merzimdi qyzmetin ótep jatqan sarbazdyń komaǵa túsýine qatysty málimdeme jasady.
«9 maýsymda Jambyl oblysynyń Qordaı aýdandyq ortalyq aýrýhanasyna Gvardeısk garnızonynyń merzimdi qyzmettegi áskerı qyzmetshisi shuǵyl jatqyzyldy. Bastapqyda ózin álsiz sezinip, qyzýy kóterilgen sarbaz Gvardeısk garnızonyndaǵy áskerı gospıtaldiń juqpaly aýrýlar bólimine jetkizilgen bolatyn. Medıtsınalyq tekserýler men zertteýler áskerı qyzmetshiden ekijaqty polısegmentti pnevmonııa anyqtady. Naýqastyń jaǵdaıy aýyr dep baǵalanyp otyr. Qazir oǵan barlyq qajetti medıtsınalyq kómek kórsetilýde. Sonymen birge ol jerde Qorǵanys mınıstrligi áskerı klınıkalyq gospıtaliniń quramyna anestezıolog, reanımatolog jáne terapevt dárigerler kiretin kóshpeli brıgadasy jumys istep jatyr», - delingen habarlama.
Áskerı qyzmetshi emdeý mekemesine túsken kezde onyń denesinen kógergen nemese zaqymdaný izderi bolmaǵanyn atap ótý kerek. Merzimdi qyzmettegi sarbazǵa qatysty kelisimshart boıynsha áskerı qyzmetshi tarapynan bılikti asyra paıdalaný faktisi boıynsha QR ІІM Áskerı tergeý basqarmasy qylmystyq is qozǵady. Tekserý júrgizilip jatyr. Tergeý múddesi úshin basqa aqparattar jarııa etilmeıdi. Іs Qorǵanys mınıstriniń erekshe baqylaýynda.
Aıta keteıik, Prezıdent sarbazdyń komaǵa túsýine qatysty mán-jaıdy zerttep, kináli adamdardy jazalaýdy talap etti.
Jambyl oblysynda sarbaz jansaqtaý bólimine túsken edi. Oqıǵa 9 maýsym kúni bolǵan. Jambyl oblystyq Densaýlyq saqtaý basqarmasy baspasóz qyzmeti sarbazdyń jaǵdaıy aýyr ekenin málimdedi.
«Naýqas 9 maýsym kúni Gvardeısk áskerı gospıtalinen jedel járdem kóligimen jetkizildi. Qordaı ortalyq aýdandyq aýrýhanasyna «polısegmentaldy pnevmonııa» dıagnozymen jatqyzyldy. Oń jaqta plevrıt. 3-4 dárejeli juqpaly toksıkalyq shok. Sepsıs. Mıdyń gıpoksııalyq isinýi, tserebraldy koma 2-3. DVS sındromy. Naýqas klınıkalyq ólimdi bastan keshken. Qazirgi ýaqytta naýqastyń jaǵdaıy óte aýyr, kóptegen músheler jetkiliksizdigi baıqalady. Atap aıtqanda, tynys alý, júrek, baýyr, tserebraldy jáne ınfektsııalyq toksıkalyq shok belgileri bar. Gemofıltratsııa jáne dári-dármekpen emdeledi», - delingen habarlamada.
