Sarbaz 2.0: Jasandy ıntellekt JOO-ǵa túsý protsesin jeńildetedi

ASTANA. KAZINFORM – Endi jas sarbazdardyń joǵary oqý oryndaryna túsý protsesi jeńildeı túspek. «Sarbaz 2.0» jobasy aıasynda jasandy ıntellekt elementteri engizilip, keıbir protsester avtomattandyrylady. 

Bul týraly búgin «Qazaqstan Respýblıkasyndaǵy Qarýly Kúshterdiń tsıfrlyq transformatsııasy» baspasóz konferentsııasynda Qorǵanys mınıstriniń tsıfrlandyrý jónindegi orynbasary Darhan Ahmedıev málimdedi.

– Biz «Sarbaz 2.0» jobasy aıasynda jasandy ıntellekt elementterin engizýdi qarastyryp jatyrmyz. Olar JOO bergen usynymdardy paıdalanýshy profıli arqyly baǵdarlamalardy tańdaýdy, qujattardy avtomatty túrde taný men tekserýdi, sondaı-aq oqý úlgerimine taldaý júrgizýdi jáne JOO-ǵa túsý boıynsha usynymdar berýdi qamtıdy. Paıdalanýshy SMS nemese e-mail arqyly habarlama alady. Al basshylyq osy portal arqyly statıstıkany baqylap, taldaý jasaı alady. Jobaǵa engizilgen chat-bot jıi qoıylatyn suraqtarǵa jaýap bere alady. Bul boıynsha qazir jumystar atqaryp jatyrmyz, – deıdi Darhan Ahmedıev.

Eske sala keteıik, buǵan deıin 20 myń jigittiń áskerden qashyp júrgeni týraly habarlaǵan edik.