Saraıshyq týrıstik nysandar qataryna kirýi kerek - Májilis depýtaty Beıbit Baımaǵambetuly

NUR-SULTAN. QazAqparat - Joǵary oqý oryndarynda arheologııalyq mamandyqty kúsheıtý kerek. Myqty arheolog maman daıyndaý úshin qysqa merzimdi arheologııalyq praktıka tym az. Bul týraly elordada ótken «Saraıshyq - Uly dala muraǵaty: memlekettik jáne tarıhı sabaqtastyq» atty dóńgelek ústelde aıtyldy, dep habarlaıdy QazAqparat tilshisi.

«Búgin mádenı muramyzdy saqtaý jáne nasıhattaý máselesi kóterilip otyr. Osy sharada aıtylatyn usynystardy júıelep, naqty jumys isteýge daıynbyz. Osy oraıda «Altyn Orda ǵasyryna arnaıy memlekettik ǵylymı-zertteý konkýrstaryn jarııalaý kerek« degen usynys aıtylyp otyr. Sońǵy eki jyl boıy jyldyq bıýdjetten jas ǵalymdardyń ǵylymı-zertteý jumystaryna 3 mlrd teńge qarjy bólinip otyr. Atalǵan jobany júzege asyrý úshin qarajat bar dep oılańyzdar», - dedi óz sózinde QR Parlamenti Májilisiniń depýtaty Beıbit Baımaǵambetuly.

Ol byltyr jyl sońynda tarıhı-mádenı murany saqtaý týraly zań qabyldanǵanyn atap ótti.

«Ol zańmen bárińiz tanystyńyzdar dep oılaımyn. Endi normatıvtik-quqyqtyq qujattar daıyndaý, zańdy júzege asyrý jumystary QR Mádenıet jáne sport mınıstrliginiń qolynda. Tarıhı, mádenı muramyzdy saqtaý úshin elimizde ekspedıtsııa ótkizgen durys. Kóne joldar, jaıylymdar, jaılaý, qystaýlar turǵan jerlerde tarıhymyz bar», - deıdi ol.

Sondaı-aq, depýtat týrızmdi damytý baǵytynda on aımaqqa basymdyq berilgenin, onyń ishinde Saraıshyq joq ekenin aıtty.

«Negizinde Saraıshyq týrıstik nysandar qataryna kirýi kerek edi. Eń aldymen joǵary oqý oryndarynda arheologııalyq mamandyqty kúsheıtý kerek. Myqty arheolog maman daıyndaý úshin qysqa merzimdi arheologııalyq praktıka tym az», - deıdi Beıbit Baımaǵambetuly.

Shara Altyn Ordanyń 750 jyldyǵy, Qasym hannyń týǵanyna 575 jyl, Qazaq handyǵynyń 555 jyldyǵyna oraı ótti.