Saraıshyq shahary ashyq aspan astyndaǵy mýzeıge aınalýy múmkin
ASTANA. QazAqparat - Elimizdegi kóne qalalardyń biri qazirgi Atyraý oblysy aýmaǵynda ornalasqan. Qazaq handyǵynyń astanasy bolǵan Saraıshyqta búginde arheolog-ǵalymdar qazba jumystaryn júrgizip jatyr. Buǵan sebep taıaýda Reseı muraǵatynan tabylǵan ejelgi shahardyń kóne syzbalary, dep habarlady búgin 24.kz.
Eski shahardyń ornyndaǵy myń jarym sharshy metr aýmaqtaǵy qazba jumystary úzilissiz júrip jatyr. Ǵalymdar men tarıh fakýltetiniń stýdentteri arshylǵan jerdiń topyraǵyn súzip, tabylǵan ár zattyń syryna úńilýde. 1,5 metrlik tereńdikten tabylǵan tıyndar men áshekeı buıymdardy mamandar XVII ǵasyrda soǵylǵan deıdi.
«Bet jaǵynan ortaǵasyrlyq monetalar tabylyp jatyr. Sonymen qatar qaptama plıta tabyldy. Bul - sol ýaqytta úlken ǵımarattardyń syrtyn qaptaǵan, syrly boıaýmen boıalǵan tas»,-deıdi oblystyq tarıhı-ólketaný mýzeıi ǵylymı-zertteý sektorynyń meńgerýshisi Baqytgúl Hasanova.
Telearna saıtynyń habarlaýynsha, taıaýda Máskeý muraǵatynan kóne qalanyń syzbasy tabylǵan. Tarıhshylardyń úmitin oıatqan da osy derek. 1760 jyldary elimizdiń batys óńirin aralaǵan reseılik ǵalymdar toby Saraıshyq qalasynyń ornalasý tártibin, saqtalǵan ǵımarattardy anyqtap, qajetti jerlerine belgi soǵyp qoıǵan eken. Otandyq ǵalymdar osy kartany kádege jaratqan.
«Bul biz qarastyrǵan Saraıshyq qalasynyń teń jartysysnan kóbin sý shaıyp ketti degen joba durys bolmaı shyqty. Óıtkeni karta boıynsha Saraıshyqtyń 80 paıyzy tolyq saqtalǵanyn kórsetip otyr. Sol karta boıynsha XVIII ǵasyrdaǵy buryn biz tek ańyz dep júrgen kóptegen nárseniń jobasy anyqtaldy. Ol kartada Jánibektiń Ceker kóliniń orny, Han kóli degen kólderdiń orny belgili otyr. Sonymen birge Qasymhannyń kesenesiniń orny da osy kartada jaqsy kórsetilgen»,-deıdi arheologııalyq ekspedıtsııanyń jetekshisi Marat Qasenov.
Ǵalymdardyń tapqan tyń derekteri qazaq eliniń tarıhyn zertteýge úles qosary anyq. Kóne qaladaǵy qazba jumystary qar túskenge deıin jalǵasady. Ekspedıtsııa jumysynyń nátıjeli júrýine barlyq jaǵdaı jasalǵan. Saraıshyqty zertteý keler jyly da jalǵasady. Al odan keıingi kezekte ejelgi shahardy ashyq aspan astyndaǵy mýzeıge aınaldyrý isi josparlanyp otyr, dep jazady 24.kz.
