Saraıshyq, lotos alqaby, tuzdy kól: Atyraýda týrızmdi damytýǵa qandaı múmkindik bar
«Oblystaǵy týrızmdi damytý – mańyzdy mindettiń biri. Árıne, Atyraý munaıymen áıgili. Biraq, munda týrısterdiń qyzyǵýshylyǵyn týǵyzatyn basqa da rýhanı qundylyqtar bar. Ony búkil Qazaqstannyń brendine aınaldyrýǵa bolady. Aldymen ólkeniń tarıhı-mádenı muralaryna aıryqsha mán berý qajet. Saraıshyqty el ishinde jáne shet memleketterde dáripteýimizge bolady.«Orta ǵasyrlyq Saraıshyq» jobasyn sońyna deıin jetkizý kerek. Sondaı-aq, arnaıy vızıt-ortalyqty ýaqytyly iske qosý mańyzdy. Kóne qalanyń ornyn týrıstik nysan retinde damytýǵa jáne onyń tanymal-dyǵyn arttyrýǵa arnalǵan tujyrymdama ázirleý qajet. Bul – búkil Qazaqstannyń týrızm salasy úshin mańyzdy», - dedi Memleket basshysy.
Onyń aıtýynsha, mádenı týrızm salasyn tsıfrlandyrýǵa basa mán bergen jón.
«Biz týrıstik nysandarymyzdy álemdik standartqa jaqyndata berýimiz kerek. Bul jaqta ekologııalyq jáne tanymdyq týrızmdi damytýǵa mol múmkindik bar. Qıǵash ózeniniń boıynda lotos gúlderi ósetinin, ókinishke qaraı, kóbi bile bermeıdi. Bul jer – lotostyń eń qıyr soltústiktegi mekeni. Ózimizdiń qyzǵaldaq sııaqty lotos alqabyn da tanymal etý úshin naqty sharalar qabyldaǵan jón. Osyndaı tańǵajaıyp dúnıeler týraly fılmder túsirý qajet, olardy shetelde belsendi túrde dáripteýimiz kerek. Inderdegi tuzdy kólde emdeý-saýyqtyrý týrızmin damytýǵa múmkindik mol. Ol úshin tıisti memlekettik organdar kóldiń mártebesin aıqyndaýǵa tıis», - dep túıindedi Qasym-Jomart Toqaev.
Prezıdenttiń paıymynsha, Atyraý munaı men gazǵa ǵana úmit artpaı, týrızm sekildi bolashaǵy zor salalardy damytýy qajet.
Eń bastysy, bastamalardy batyl qolǵa alý kerek. Óńirdiń týrıstik áleýetin arttyrý úshin Úkimet pen ákimdik joldardy jóndep, týrıstik nysandardyń ınjenerlik kommýnıkatsııasyn retke keltirýge tıis.
«Atyraý oblysyn damytý týraly meniń paıymdarym – osyndaı. Birqatar naqty tapsyrma berildi. Onyń bárin muqııat oılastyryp, ýaqytyly jáne sapaly oryndaý qajet. Jumys barysy meniń tikeleı baqylaýymda bolady, sebebi bul – oblys halqyna óte qajet jumys. Ony sońyna deıin atqaryp shyǵýymyz kerek», - dep túıindedi Memleket basshysy.
Foto:img.qazmonitor.com
