Saraıshyq qalasynyń qaldyǵy Jaıyqqa jutylyp bara jatyr
ASTANA. 15 mamyr. QazAqparat - Saraıshyq qalasynyń qaldyǵy Jaıyqqa jutylyp bara jatyr. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Azat Perýashev osy máseleni kóterdi.
«Ótkenge qurmetpen qaraǵanymyz jón. Qazaqtyń qaı-qaı jeri de qasıetti, tunǵan tarıh. Osyndaı kıeli mekenniń biri - Qazaq handyǵynyń astanasy - Saraıshyq qalasy bolyp tabylady. Saraıshyq ózge qalalarmen qatar, Ertisten Dýnaıǵa deıingi Ulan baıtaq ólkeni bılegen, keıinirek Altyn Orda atalǵan ımperııa - Joshy ulysynyń kezinde salynǵan. Saryaıshyq Qasym hannyń basshylyǵymen qazaq handyǵynyń astanasy atanǵan. Jibek jolynyń mańyzdy baǵytynda ornalasqannan keıin, Saryaıshyq sol zamanǵy eń damyǵan jáne sáýletti qalalardyń biri boldy. Bul qalada XIV ǵasyrda Jánibektiń jáne Berdibektiń Altyn Ordanyń handyq taqqa otyrý rásimderi ótken. Bul jerde kezinde úsh júzge tolyqtaı moıyndalǵan jeti han jerlengen», deıdi depýtat. Onyń aıtýynsha, osynaý qalada tabylǵan jáne áli tabylmaǵan muralardyń qazaq eli úshin oryny bólek. Biraq ta, jyl saıyn sý tasyǵan kezde 5-10 metrge deıingi jerin qulatyp, Saraıshyq qalasynyń qaldyǵy Jaıyqqa jutylyp bara jatyr.
«Qazir de qala ornynda shashylyp jatqan adamnyń súıekterin kórýge bolady. Eger ózen baǵytyn ózgertpesek, jaqyn arada qaladan túk qalmaıdy. Al bul bizdiń ótken zamanymyzdyń tarıhyna úlken zııan. Qalanyń qalǵan bóligin qutqarýǵa jalǵyz joly bar, ol - bekinis salý», - deıdi A. Perýashev. Onyń sózine qaraǵanda, qalany aǵystan qorǵaıtyn bekinis máselesi jaqynda sheshilmese, onda urpaq úshin asa mańyzdy, qundylyǵyn eshqandaı aqshamen ólsheı almaıtyn tarıhı jádigermen máńgilikke qoshtasýǵa májbúrmiz.
«Sondyqtan da Qazaq handyǵynyń alǵashqy astanasynan qalǵan asyl murany saqtap qalý úshin barynsha kúsh salǵanymyz ıgi edi», - dedi depýtat.
