Saraıshyq qalashyǵynyń ornynan noǵaı-qazaq kezeńindegi monsha tabyldy

ATYRAÝ. QazAqparat – Atyraý oblysyndaǵy Saraıshyq qalashyǵynyń ornynan noǵaı-qazaq kezeńindegi monsha tabyldy, dep habarlaıdy QazAqparat tilshisi.

«Saraıshyq» mýzeı-qoryǵynyń bas ınspektory, arheolog Aıbek Turarulynyń aıtýynsha, bul – tarıhı qalashyqtyń ornynan tabylǵan ekinshi monsha.

«Saraıshyq qalashyǵynyń ornynan tabylyp jatqan olja kóp. Máselen, 2005 jyly Jaıyq ózeniniń jarqabaǵynan monshanyń jarty bóligi saqtalǵan orny tabyldy. Al, jaqynda ekinshi monshany taýyp otyrmyz. Eki monshanyń bir-birine uqsastyǵy bar. Bul – halyqqa arnalǵan qoǵamdyq maqsattaǵy emes, turǵyndardyń óz otbasyna arnap salǵan jeke menshiktegi monsha», -deıdi Aıbek Turaruly.

Arheologtyń aıtýyna qaraǵanda, Altyn Ordanyń gúldengen dáýirinde qoǵamdyq monshalar keń taraǵan. Keıinen birneshe bólikke ydyraǵan kezde qoǵamdyq monshalar qyzmeti toqtap qalǵan.

«Sol sebepten, ár aýqatty otbasy osyndaı shaǵyn monshany salǵan bolar dep oılaımyz. Bıyl tabylǵan monshany noǵaı-qazaq kezeńine sáıkes keledi dep esepteımiz», -dep túsindirdi Aıbek Turaruly.

Onyń deregine qaraǵanda, monsha úsh bólikten turady. Kıim sheshetin, jýynatyn bólmeler, pesh ornatylǵan bóligi bar.

«Kıim sheshetin bólmeniń edenine qysh kirpishter tóselip, aq alebastrdan sylaq jaǵylǵan. Jýynatyn bólmeniń edeninde de qysh kirpishter bolǵan. Kirpishterdiń jıegin aq alebastr eritindisimen bekitken. Al, edenniń shetinen qabyrǵaǵa tiginen ornalasqan qysh kirpishter qalanǵan. Eden ortasynda sýaǵar salynǵan. Sýaǵar shuńqyrynyń qabyrǵasyna qysh kirpishter órilgen. Kıim sheshetin bólmeniń batys jaǵynda, jýynatyn bólmeniń soltústik jaǵynda pesh orny anyqtaldy», -deıdi arheolog.

Eske sala ketelik, buǵan deıin Saraıshyqta ótetin ulttyq quryltaıda Qasym han eskertkishi ashylatynyn jazǵan bolatynbyz.