Saraıshyqtyń tarıhyn zertteý, qundylyǵyn nasıhattaý jetispeıdi – Mereke Qulkenov

ATYRAÝ. KAZINFORM – Atyraý oblysyndaǵy ortaǵasyrlyq Saraıshyq qalasynyń tarıhyn zertteý, qundylyǵyn nasıhattaý jetispeıdi. Bul jóninde Ulttyq quryltaı múshesi, Qazaqstan Jazýshylar odaǵynyń tóraǵasy Mereke Qulkenov aıtty. 

Qalamgerdiń aıtýynsha, jeti nomınatsııa boıynsha «Qulager» báıgesi jarııalanǵan. Ulttyq oıyndardy, salt-dástúrdi ulyqtaý úshin jańa kórkem shyǵarmalar anyqtalady.

«Biz Qazaqstandaǵy kórkem shyǵarmanyń deńgeıin kóteremiz. Alaıda, qazaq ádebıetiniń kemshin tusy kóp. Ásirese, qazaq prozasy men poezııasy shet tiline durys aýdarylmaı jatyr», - dedi Mereke Qulkenov.

Onyń pikirinshe, Jaıyq ózeniniń jaǵalaýyndaǵy kóneniń kózi – Saraıshyq qalashyǵyna mańyz berilip otyr.

«Biraq, Saraıshyqtyń zerttelý jaǵy, qundylyqtaryn dáripteý jaǵy áli jetispeıdi. Onyń sebepterin anyqtaǵan jón. Jalpy, munaıly ólkede eki nárse qolǵa alynýǵa tıis. Onyń biri – Beıbarystyń ǵylymı ortalyǵy bolýy qajet dep esepteımin. Byltyr biz arab elinde bolǵan kezimizde sondaı ortalyq qurylǵan edi. Arabtyq áriptester ony Qazaqstanmen birlesip qurýǵa yntaly bolyp otyr. Óıtkeni, ǵalymdardy jiberý, qarjylandyrý máselesi qamtylǵan edi. Biz daýylpaz aqyn Mahambetti umytyp kettik. Sol sebepten, oǵan da bir ortalyq kerek sekildi. Menińshe, Atyraý óńirindegi joǵary oqý oryndary osyǵan jete kóńil bólýi kerek. Árıne, tek ýnıversıtetter ǵana emes, oblystaǵy mádenıet basqarmasy, basqa da ortalyqtar osy máseleni qolǵa alsa degen usynysymyz bar», - dedi Mereke Qulkenov.

Eske sala ketelik, budan buryn Ulttyq quryltaı el damýynyń baǵytyn aıqyndaıtyn biregeı platformaǵa aınalǵanyn jazǵan edik.

Sondaı-aq, Qazaqstanda ótetin V Dúnıejúzilik kóshpendiler oıyndaryna 58 el qatysady.

Mádenıet jáne aqparat mınıstri Kreatıvti ındýstrııa ókilderi úshin arnaıy salyqtyq jeńildikter engizilgenin aıtty.