Saraıshyqta zıratqa sý kirmes úshin 800 metr janama bóget soǵyldy

ATYRAÝ. KAZINFORM — Ór sýynyń aǵyny qatty bolýy saldarynan «Atyraý – Inder» tas jolynyń Saraıshyqtan keıingi 44 shaqyrymdaǵy jol jyryldy. Mahambet aýdanynyń TJ jónindegi jedel shtabynyń sheshimimen jasalǵan bul ádis tasqyn sýdyń baǵytyn saı-salaǵa burý maqsatynda atqarylyp otyr.

«Qazirgi ýaqytta Saraıshyq aýyly ór sýynyń qorshaýynda qalyp otyr. Joldy jyrý, Qursaı kanalyn jyrý arqyly sýdy saı salaǵa aǵyzý jumystary jasalyp jatqanymen, ór sýynyń qarqyny kúsheıip tur. Aýyldan eki shaqyrym qashyqtyqta ornalasqan zırattardy tasqynnan saqtap qalý úshin, jedel túrde janama 800 metr bolatyn bóget soǵyldy. Qazir zırattyń basynda 12 aýyr tehnıka bógetti sýdyń jaryp ketpeýin qamtamasyz etýde. Tasqynmen kúres táýlik boıy úzilissiz júrip jatyr»,- dedi Saraıshyq aýyldyq okrýginiń ákimi Jannat Kenjeǵalıeva.

Saraıshyq aýylynda tasqynmen kúreske arnaıy tehnıkalardy qosa alǵanda, 95 sarbaz, 49 TJ mamandary, aýyl turǵyndary jumyldyryldy. 

Eske sala ketelik, «Kazgıdromettiń» 18 mamyr, 8.00 saǵattaǵy málimeti boıynsha, Mahambet aýdanyndaǵy sý deńgeıi bir táýlikte + 8 santımetrge kóterilip, sý deńgeıi 1008 santımetrge jetti.