Saraıshyqta arheologııalyq qazba jumysy bastaldy
ATYRAÝ. KAZINFORM — Atyraý oblysynyń eki aýdanynda arheologııalyq qazba jumysy bastaldy. Onyń biri Qyzylqoǵa aýdanyndaǵy Qarabaý, ekinshisi Mahambet aýdanynyń Saraıshyq aýylynda júrip jatyr.
Atyraý oblystyq tarıhı-ólketaný mýzeıi janynan qurylǵan ekspedıtsııa Qyzylqoǵa aýdanyndaǵy Qarabaý aýylyna keldi.
Ekspedıtsııaǵa tarıh ǵylymdarynyń kandıdaty Marat Qasenov jetekshilik etedi.
Mýzeıdiń usynǵan aqparatyna qaraǵanda, arheologııalyq qazba jumysy bıylǵy josparǵa sáıkes qolǵa alynyp otyr.
«Atyraý oblystyq tarıhı-ólketaný mýzeıi maýsym-tamyz aılarynda Qyzylqoǵa aýdanynyń Qarabaý aýyly mańyndaǵy erte temir dáýiriniń Qarabaý-2 qorǵanyna arheologııalyq qazba jumystaryn júrgizedi. Atalǵan qorǵannyń dıametri — 70 metr, al, bıiktigi — 300 santımetr. Qarabaý aýylynan soltústik batysqa qaraı 8,5 shaqyrym qashyqtyqta ornalasqan birneshe qorǵan bar», -dep habarlady oblystyq mýzeıden.
Al, Saraıshyq aýyldyq okrýginiń ákimi Janat Kenjeǵalıevanyń aıtýynsha, sý tasqyny kezinde arheologııalyq qazba oryndaryna zaqym kelmegen.
«Qazir Jaıyq ózeniniń jaǵasyndaǵy tarıhı orynda qazba jumysy bastaldy. Arheologııalyq jumysyn júrgizýdi „Saraıshyq“ memlekettik tarıhı-mádenı mýzeı-qoryǵy» RMQK-dan 3 arheolog, H.Dosmuhamedov atyndaǵy Atyraý ýnıversıtetinen 18 stýdent, Batys Qazaqstan oblysyndaǵy ýnıversıtetten 22 stýdent qolǵa aldy. Qazba jumysy shilde aıyna deıin jalǵasady», -deıdi Janat Kenjeǵalıeva.
Eske sala ketelik, budan buryn Jaıyq ózeninen ortaǵasyrlyq Saraıshyq qalashyǵyna qater tónbeıtinin habarlaǵan edik.
