Saraıshyq aýylyndaǵy evakýatsııa pýnkti 300 adamdy qabyldaı alady

ATYRAÝ. KAZINFORM – Atyraý oblysynyń Saraıshyq aýylynda 300 adamdy qabyldaıtyn evakýatsııalyq pýnkt daıyndaldy.

Mahambet aýdany ákimdiginiń málimetine súıensek, sý tasqynyna baılanysty 22 evakýatsııalyq pýnkt daıyn tur.

Sonyń biri Saraıshyq aýylynda ornalasqan Q.Qarashauly atyndaǵy orta mektepte ashylǵan. 

Mekteptiń dırektory Danııa Sabyrovanyń aıtýynsha, oqýshylar 10 sáýirden beri sabaqty onlaın oqýǵa jiberigen.

Al, 11 sáýirde bilim ordasyn evakýatsııalyq pýnktke laıyqtaý bastalǵan. 

«Qazir mektepte ashylǵan evakýatsııalyq pýnkt daıyn tur. Sý tasqynyna baılanysty turǵyndardy evakýatsııalaý qajettigi týyndasa, bizdiń pýnkt 250-den 300 adamǵa deıin qabyldaı alady. Evakýatsııalyq pýnkte qajetti qor jasaqtaldy. Qorda birinshi kezekte tutynýǵa qajetti zattar, onyń ishinde, sý, azyq-túlik, dári-dármek pen jeke kútim jasaýǵa arnalǵan gıgıenalyq quraldar bar», -dedi Danııa Sabyrova.

Eske sala ketelik, buǵan deıin Jaıyq ózeninen ortaǵasyrlyq Saraıshyq qalashyǵyna qater tónbeıtinin habarladyq. 

Sondaı-aq, Inderde — 15, Mahambet aýdanynda — 22 evakýatsııalyq pýnkt daıyn tur.