SARATS-2 jobasyn júzege asyrý jumystary bastaldy
Onyń sózinshe, aýqymdy jobanyń ekinshi fazasy 8 komponentten turady. Ol respýblıkalyq bıýdjetten jáne Dúnıejúzilik bank zaemy esebinen eki kezeń boıynsha júzege asyrylady.
«QR Premer-Mınıstri Baqytjan Saǵyntaev Qyzylorda oblysyndaǵy jumys sapary barysynda Aral qalasynda bolǵan kezinde Premer-Mınıstrdiń orynbasary, Aýyl sharýashylyǵy mınıstri Ómirzaq Shókeevke Soltústik Aral jobasyn jáne Qyzylorda oblysyndaǵy sýarmaly jerlerdiń melıoratıvtik jaǵdaıyn jaqsartý boıynsha jobalaryn iske asyrý barysyn qarap, qajetti usynystar ázirleýdi tapsyrdy», -dedi oblys ákiminiń orynbasary.
Osy jyldyń 27 sáýirinde ótken keńeste múddeli memlekettik organdardyń qatysýymen atalǵan máseleler jan-jaqty qaraldy. Oǵan aýyl sharýashylyǵy, qarjy, ulttyq ekonomıka, syrtqy ister, ındýstrııalyq damý, ishki ister mınıstrlikteri, Qyzylorda oblysynyń ákimdigi, gıdrotehnıkter, «Kazgıprovodhoz» jobalaý ınstıtýty, halyqaralyq Araldy qutqarý qory mamandary qatysty.
Májiliste elimizdiń bıýdjeti esebinen Soltústik Aral jobasynyń keıbir komponentterin júzege asyrý boıynsha buryn qabyldanǵan sheshimder, sondaı-aq Kókaral bógetiniń beriktigin qamtamasyz etý men Syrdarııa ózeniniń atyraýyn qalpyna keltirý boıynsha alǵashqy kezektegi sharalar barysy qaraldy. Atalmysh jobanyń ekinshi fazasy 8 komponentten turady. Jalpy, bul jobany 2 kezeńde júzege asyrý josparlanǵan.
Alǵashqy kezeńde - 6, al ekinshisinde - 2 komponent jasalady. Dúnıejúzilik bankten qarjylandyrý rásimderiniń sozylýyna baılanysty Qyzylorda oblysy ákimdiginiń usynysy boıynsha Úkimetpen SARATS-2 jobasynyń alǵashqy kezeńin júzege asyrýdy respýblıkalyq bıýdjet esebinen Dúnıejúzilik bank qarajatynsyz bastaý jóninde sheshim qabyldandy.
Qyzylorda sý torabyn keshendi jóndeý komponenti boıynsha aýyl sharýashylyǵy mınıstrligi ınvestıtsııalyq usynys ázirlep, Ulttyq ekonomıka mınıstrliginiń ekonomıkalyq qorytyndysy alyndy. Qarjy mınıstrligine joba-smetalyq qujattar ázirleý úshin 198 mln. teńge bólý jóninde bıýdjettik ótinim tapsyryldy.
«Bıyl respýblıkalyq bıýdjetti naqtylaý barysynda qarajat bólý josparlanyp otyr, Sý toraby 2019 jyldan bastap jóndeledi. Jalaǵash aýdanyndaǵy Turymbet jáne Qorǵansha ýchaskelerinde Syrdarııa ózeniniń arnasyn túzetý jáne Qarmaqshy, Qazaly aýdandaryndaǵy qorǵanys bógetterin nyǵaıtý komponenteri boıynsha oblystyq bıýdjet esebinen JSQ ázirlendi. Ol jóninde 2018 jylǵy 28 naýryzdaǵy memlekettik saraptamanyń qorytyndysy bar. Jobalar «Sý tasqyny qaterleriniń aldyn alý jáne joıý jónindegi 2017-2020 jyldarǵa arnalǵan sharalar kesheni» Jol kartasy sheńberinde júzege asyrylatyn bolady.
Qazaly aýdanynyń Birlik aýyly mańynda avtomobıl kópirin salý komponent boıynsha oblystyq bıýdjetten jobanyń TEN-in ázirleýge 20,9 mln. teńge bólindi. TEN jáne JSQ ázirlengennen keıin respýblıkalyq bıýdjetten qarjylandyrý úshin atalǵan komponent ınvestıtsııalar jáne damý mınıstrligine usynylady. Komponent Óńirlerdi damytý baǵdarlamasy sheńberinde 2019 jyldan bastap júzege asyrylady»,-dedi S.Qojanııazov.
Al Qamystybas pen Aqshataý kólder júıelerin qalpyna keltirý komponenti boıynsha tómendegi is-sharalar jasalady. Oblys ákimdigi osy jyly kólder júıesin qujattandyryp, Sý resýrstar komıtetiniń bólimshesiniń teńgerimine beredi. Komponent Sý resýrstar komıtetiniń aǵymdaǵy bıýdjettik baǵdarlamalary sheńberinde iske asyrylady.
Oblys ákiminiń orynbasary Qamystybas balyq ósirý pıtomnıginiń Tastaq ýchaskesindegi balyq ósirý toǵandaryn keńeıtý komponenti boıynsha mynadaı jumystar jasalatynyn jetkizdi.
«Balyq sharýashylyǵy Komıtetiniń usynysy boıynsha atalǵan komponentke ózgerister engiziledi. Balyq ósirý pıtomnıginiń tozǵanyn eskersek, birinshi kezekte Kamystybas balyq ósirý pıtomnıginiń ózi qaıta jańǵyrýdan ótkiziledi, sodan keıin «Tastaq» ýchaskesindegi balyq ósirý toǵandary qaıta jańǵyrtylady. Komponent balyq sharýashylyǵy Komıtetiniń aǵymdaǵy bıýdjettik baǵdarlamalary sheńberinde iske asyrylady. Osylaısha, Dúnıejúzilik banktyń zaemynsyz SARATS-2 jobasynyń ekinshi fazasynyń birinshi kezeńin júzege asyrý boıynsha jumystar bastaldy dep aıtýǵa bolady», dedi ol.
Talqylaý qorytyndysy boıynsha Soltústik Aral jobasyn iske asyrý jóninde kelisilgen eki kezeńnen turatyn usynystar ázirlendi. Birinshi kezeńde QR bıýdjeti esebinen Dúnıejúzilik bank zaemynsyz Kókaral bógetiniń beriktigin qamtamasyz etý jáne Syrdarııa ózeniniń atyraýyn qalpyna keltirý jumystary bastalmaq. Joba Kókaral bógeti men sý jiberý qurylysyn nyǵaıtýdy jáne Syrdarııa ózeniniń «Qarashalań» jáne «Tuşybas» kólderi arqyly ótetin arnalaryn qalpyna keltirýdi kózdeıdi.
«Dúnıejúzilik bank zaemy esebinen ekinshi kezeńde tómendegi jumystar jasalady dep josparlanyp otyr. Máselen, Aral óńiriniń odan ári damytý jáne ekologııasyn jaqsartý baǵdarlamasyn ázirleý jáne iske asyrýǵa mán beriledi.. Quramynda kollektorlyq-drenajdyq sýlardy Aral teńizine burý múmkindikterin qarastyrý boıynsha «Sýarmaly jerlerdiń ırrıgatsııalyq-drenajdyq júıelerin jetildirý» jobasyn iske asyrý kózdelgen. Jobanyń júzege asyrylýy áleýmettik-ekonomıkalyq damýyna jáne halyqtyń ál-aýqatynyń jaqsarýyna múmkindik beredi. Ásirese aýyl halqynyń, sýarmaly jerlerdegi sý shyǵynyn azaıtyp, Aralǵa sýdyń túsýin arttyrady. Kókaral bógetiniń tómengi jaǵynda gıdrologııalyq jáne orman-melıoratsııalyq jumystar júrgiziledi. Bul óz kezeginde sýly-batpaqty alqaptardy qalyptastyrý esebinen Aral óńiriniń ekologııasyn jaqsartady, teńizdiń shyǵys jaǵalaýy boıynda jasyl beldeýdiń qurylýy jaǵalaýdaǵy eldi mekenderdi qum kóshkininen saqtaýǵa múmkindik beredi», dedi S.Qojanııazov.
Sonymen birge, ekinshi kezeń sheńberinde Syrdarııa ózeniniń basseıninde avtomattandyrylǵan sý eseptegish júıeni qurý josparlanýda.
Ádiljan Úmbet
Foto: livejournal.com
