Saratovta 5 adamnyń ómirin qıǵan jol apaty: Ekinshi júrgizýshige aıyp taǵylǵan joq
ASTANA. QazAqparat - Osy jyldyń qarasha aıynda Reseıdiń Saratov oblysynda tirkelgen jol apatyna qatysty sotqa deıingi tergeý amaldary júrgizilip jatyr, dep habarlaıdy QazAqparat tilshisi.
«Ekinshi júrgizýshi aýrýhanada emes. Shyǵyp ketti. Ol qylmystyq is boıynsha júrip jatyr. Óziniń týǵan-týysqandarymen Satarovta páter jaldap turyp, tergeý barysyna qatysýda. Tutqyndalǵan joq», - dedi QR SІM-de ótken baspasóz máslıhatynda vedomstvonyń resmı ókili Aıbek Smadııarov.
Onyń aıtýyna qaraǵanda, aıyp tek bireýine - sol apat kezinde rýlde bolǵan júrgizýshige ǵana taǵylǵan.
«Al ekinshi júrgizýshige, ıaǵnı, aıyp taǵylǵan júrgizýshiniń kómekshisine eshqandaı aıyp taǵylyp otyrǵan joq. Qazirgi ýaqytta tergeý amaldary júrgizilip jatyr. Sot kúniniń belgilenýi tergeýge baılanysty bolady», - dedi Aıbek Smadııarov.
Eske sala ketsek, osy jyldyń qarasha aıynda Reseıdiń Saratov oblysynda Qazaqstan men Ózbekstan jolaýshylary mingen reıstik avtobýs apatqa ushyraǵan bolatyn.
«17 qarasha kúni RF Saratov oblysynyń Ozınskıı aýdanyndaǵy temir jol ótpesinde «Saratov-Oral» reıstik avtobýsy júk poıyzymen soqtyǵysty. Bastapqy málimet boıynsha, avtobýsta 7 jolaýshy bolǵan, olardyń ekeýi Qazaqstan azamattary bolsa, beseýi - ózbekstandyqtar», - dep habarlaǵan edi QR ІІM Tótenshe jaǵdaılar komıtetiniń resmı ókili Nursultan Nurahmetov.
QR SІM sol tusta apat saldarynan bes adamnyń qaza tapqanyn habarlaǵan.
«Qaza tapqandardyń barlyǵy Ózbekstan azamaty. Júrgizýshi jáne onyń kómekshisi Qazaqstan azamattary. Olar tiri. Biraq, jaǵdaılary óte aýyr, jansaqtaý bóliminde jatyr. Týystary sol jaqta. Habar berildi. Tergeý júrgizilip jatyr. Bizdiń Astrahandaǵy konsýl bul máseleni erekshe baqylaýyna alyp, kúndelikti jumysyn júrgizip jatyr», - degen edi QR SІM resmı ókili Aıbek Smadııarov.
