Saraptama ortalyǵy Jezqazǵandaǵy sýdy sapasyz dep tanydy
QARAǴANDY. QazAqparat - Prezıdent is basqarmasy medıtsınalyq ortalyǵynyń respýblıkalyq memlekettik «Sanıtarlyq-epıdemıologııalyq saraptama ortalyǵynyń» mamandary Jezqazǵan turǵyndary paıdalanyp otyrǵan ystyq jáne sýyq sýdy sapasyz dep tanydy, dep habarlaıdy «QazAqparat» HAA tilshisi.
Sanıtarlyq-hımııalyq zertteý júrgizgen toptyń quramynda jeti adam - tórt hımık-zerthanashy, feldsher- zerthanashy, zerthana meńgerýshisi men «Sanıtarlyq-epıdemıologııalyq saraptama ortalyǵynyń» basshysy Erlan Qııasov bar.
«Saraptama nátıjesi sanıtarlyq erejeniń talaptaryna sáıkes kelmeıdi», - delingen tujyrymda. 
Bul málimdeme Jezqazǵan turǵyndaryn tańqaldyrǵan joq.
«Biz sarapshylarǵa ózimizge emes, sheneýnikterge dáleldeý úshin júgindik. Sebebi turǵyndar saraptamasyz-aq sýdyń jaramsyz ekendigin bilip otyr», - dedi jezqazǵandyq belsendi Berik Jaǵyparov.
Eske salaıyq, Jezqazǵan turǵyndary ortalyq qubyr magıstralinen keletin sýyq jáne ystyq sýdyń segiz úlgi synamasyn elordalyq sarapshylarǵa jibergen edi. Ár shólmek qalanyń ártúrli aýdandarynan alyndy. Saraptamany jergilikti kásipker qarjylandyrsa, turǵyndar sol shyǵynnyń ornyn toltyrý úshin bes myń teńgeden jınaǵan.
