Saraptama nátıjesimen kelispegen jaǵdaıda qaıda júginý kerek

ASTANA. KAZINFORM – Eger júrgizilgen sot saraptamasynyń nátıjeleri kúmán týdyrsa, azamattar nemese taraptar bul jaǵdaıda saraptamany taǵaıyndaǵan organǵa júginip, qosymsha nemese qaıtalama saraptama taǵaıyndaýdy suraı alady. Bul týraly QR Ádilet mınıstrligi Sot saraptamalary ortalyǵynyń dırektory Baıtilesov Baqytjan Tólenuly Ortalyq kommýnıkatsııalar qyzmeti alańynda ótken baspasóz konferentsııasy barysynda jýrnalıstiń suraǵyna jaýap berý barysynda aıtty.

– Eger bastapqy saraptama qorytyndysy kúmán týdyrsa, bul jaǵdaıda siz quqyq qorǵaý organyna nemese saraptamany taǵaıyndaǵan organǵa dáleldi negizdememen júginip, qosymsha nemese qaıtalama saraptama taǵaıyndaýdy suraı alasyz. Sot saraptamasyn júrgizý merzimi zań boıynsha 30 kúntizbelik kún, – dedi spıker jýrnalıst saýalyna jaýap bere otyryp.

Sondaı-aq jýrnalıster sot saraptamasynyń nátıjesi dálel retinde tanylmaýy múmkin be degen qosymsha suraq qoıdy.

– Sarapshynyń qorytyndysy dáleldemelerdiń biri ǵana. Oǵan baǵa beretin sot nemese saraptamany taǵaıyndaýshy organ, ol óziniń ishki senimine súıenip sheshim qabyldaıdy. Eger saraptama nátıjesi moıyndalmasa, sot sheshim qabyldaıdy, al keıbir jaǵdaılarda sarapshyǵa qatysty jeke uıǵarym shyǵarýy múmkin, – dep naqtylady Baqytjan Baıtilesov.

Eske sala keteıik, QR Ádilet mınıstrliginiń Májbúrlep oryndatý komıteti azamattardy alaıaqtardyń zańsyz áreketterine qatysty eskertti. Sońǵy ýaqytta ózin sot oryndaýshysy retinde tanystyryp, mınıstrliktiń emblemasyn zańsyz paıdalanatyn jaǵdaılar jıilegen.