Sarapshylardyń derekterine qaraǵanda Qazaqstannyń tóńireginde turaqsyzdyqtyń 5 oshaǵy bar - Strategııalyq zertteýler ınstıtýtynyń dırektory
ALMATY. Jeltoqsannyń 2-si. QazAqparat /Erlik Erjanuly/ - Biz turaqsyz álemde ómir súrip jatyrmyz. Bizdi turaqsyz elder qorshap tur. Bul búgin Almatyda «El birligi» doktrınasy jobasyn pysyqtaýmen aınalysatyn jumys komıssııasynyń birinshi otyrysynda aıtyldy,
dep habarlaıdy QazAqparat.
«Sarapshylardyń derekterine qaraǵanda bizdiń aınalamyzda turaqsyzdyqtyń 5 oshaǵy bar. Olar - Aýǵanstan, Soltústik Pákistan, Ferǵana, Shyńjań jáne Tıbet. Bul aımaqtardan ekonomıkalyq-áleýmettik jaǵdaılardyń nasharlaýynan kóshi-qon úrdisi artyp kele jatyr. Beıresmı derekter boıynsha Qazaqstanǵa kelgen eńbek mıgranttarynyń sany 3 mıllıon adamǵa deıin jetti. Olardyń aqsha aýdarymdarynyń kólemi 1995 jyly 500 mıllıon bolsa, 2006 jyly 3 mıllıard dollardan asyp ketken. Onyń 38,5 paıyzy - Ózbekstanǵa, 25,5 paıyzy - Qyrǵyzstanǵa, 16,8 paıyzy - Tájikstanǵa jiberilgen. Bul qarajattyń jalpy ishki ónimdegi úlesi Ózbekstanda - 9 paıyz, Qyrǵyzstanda - 10 paıyz, Tájikstanda - 14 paıyz», deıdi QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Bolat Sultanov. Onyń aıtýynsha, atalmysh elderdiń ishinde Qazaqstandy Tájikstandaǵy jaǵdaı erekshe alańdatyp otyr. Bul memlekette turǵyndardyń 70 paıyz kedeıshiliktiń tómengi sheginde ómir súrýde. Eń tómengi aılyq eńbek aqynyń kólemi 7 dollar. Sarapshylardyń derekterine qaraǵanda azamattyq soǵys Tájikstandaǵy esirtki tasymalyna qoıylatyn tosqaýyldy buzdy. Máselen, 2000-2007 jyldary onda 57 tonna esirtki ustaldy. Onyń 27 tonnasy geroın. Bul Qazaqstan arqyly Reseı men Eýropaǵa áketiletin esirtki. Bolat Qylyshbaıulynyń paıymdaýynsha, qazir tájik sarapshylary da Tájikstannyń tranzıttik aımaqtan tutynýshy elge aınalýynan qorqýda.
