Sarapshylar jedeldetilgen tehnologııalyq modernızatsııanyń basty sharttaryn atady
ASTANA. QazAqparat - Astanada belgili otandyq sarapshylar men ǵalymdardyń qatysýymen Qazaqstandaǵy Úshinshi modernızatsııanyń júzege asyrylýyn talqylaýǵa arnalǵan dóńgelek ústel ótti.
QR Tuńǵysh Prezıdenti - Ult Kóshbasshysy Qorynyń janyndaǵy Álemdik ekonomıka jáne saıasat ınstıtýty (ÁESI) ótkizgen sharanyń basty maqsaty - Qazaqstannyń jahandyq básekelestiktiń joǵary deńgeıine ótýi men Úshinshi modernızatsııany júzege asyrý boıynsha qazaqstandyq sarapshylar qaýymdastyǵy ókilderiniń táýelsiz ári obektıvti pikirtalasyn uıymdastyrý bolyp tabylady.
«Modernızatsııa 3.0. Tásilder men sheshimder» taqyryby boıynsha ótkizilgen dóńgelek ústel jumysyna qatysqandar: Kamal Burhanov, «Ǵalymdar Ortalyq Azııadaǵy beıbitshilik úshin» QQ jetekshisi; Saılaý Baızaqov, Qazaqstannyń memlekettik-jeke menshik áriptestik ortalyǵynyń ǵylym boıynsha keńesshisi; Rahym Oshaqbaev, «Talap» qoldanbaly zertteýler ortalyǵy qamqorshylyq keńesiniń tóraǵasy; Vladımır Telnov, «Nur Otan» partııasynyń strategııalyq zertteýler men saıası analız ortalyǵy dırektorynyń orynbasary; Ǵanı Nyǵymetov, Eýrazııalyq ıntegratsııa ınstıtýtynyń dırektory; Saıasat Nurbek, «Astana» halyqaralyq qarjy ortalyǵynyń basqarýshy dırektory; Oljas Qudaıbergenov, CSI strategııalyq bastamalar ortalyǵynyń bas seriktesi jáne ózge de belgili sarapshylar, saıasattanýshylar men ǵalymdar.
Sharaǵa qatysýshylar Qazaqstandaǵy Tórtinshi óndiristik revolıýtsııanyń keleshegin, ınstıtýtsıonaldy ózgeristerdi, ekonomıkanyń tehnologııalyq modernızatsııasy, sonymen birge, kásipkerlik pen adamı kapıtaldyń damytý máselelerin talqylady.
- Ult Kóshbasshysy Nursultan Nazarbaev óziniń Qazaqstan halqyna Joldaýynda elimizdiń jahandyq básekelestigin qamtamasyz etetin ekonomıkalyq ósimniń jańa modelin qurastyrýdy tapsyrǵan bolatyn. Táýelsizdik alǵaly beri Qazaqstan eki birdeı modernızatsııa kezeńinen ótti - bul elimizdiń saıası jáne ekonomıkalyq órkendeýiniń negizi qalanǵan kezeń edi. Biz álemdegi básekelestikke qabiletti 50 eldiń qataryna kirdik. Modernızatsııa 3.0 - bul Qazaqstannyń jahandyq básekelestiktiń jańa deńgeıine shyǵý joly, - dedi QR Tuńǵysh Prezıdenti - Ult Kóshbasshysy Qory janyndaǵy ÁESI dırektory Erjan Saltybaev.
Onyń sózinshe, ekonomıkany jan-jaqty tsıfrlandyrý men Tórtinshi óndiristik revolıýtsııa ekonomıkalyq jáne áleýmettik damýdaǵy jyldamdatylǵan tehnologııalyq modernızatsııanyń negizgi sharty bolyp tabylady.
ÁESI pikirtalas alańy Ult Kóshbasshysynyń strategııalyq bastamalaryn nasıhattaý aıasynda jumys istep keledi.
Anyqtama: Qazaqstan Respýblıkasynyń tuńǵysh Prezıdenti - Ult Kóshbasshysy Qorynyń janyndaǵy álemdik ekonomıka jáne saıasat ınstıtýty 2003 jyldan beri jumys istep keledi. ÁESI Qazaqstan Respýblıkasy Tuńǵysh Prezıdentiniń memlekettilikti qurý men qalyptastyrý, halyqaralyq seriktestikti damytý, beıbitshilik pen turaqtylyqty saqtaýdaǵy eleýli eńbekterin zertteıdi. ÁESI ǵylymı jáne analıtıkalyq jumystary ulttyq, álemdik ekonomıkanyń, halyqaralyq qarym-qatynastyń, geosaıasattyń, qaýipsizdiktiń, ıntegratsııanyń, qazaqstandyq qaýymdastyqtyń áleýmettiń shoǵyryn, sonymen qatar, QR Tuńǵysh Prezıdenti - Ult Kóshbasshysynyń strategııalyq bastamalarynyń aýqymdy spektrin qamtıdy. 2014 jyldan bastap ÁESI Astanadaǵy «Nazarbaev ortalyǵy» ǵımaratynda jumys jasaýda.
